١٣هەمین لووتکەی رێکخراوی هاریکاریی ئیسلامی

وەزیری دەرەوەی توركیا مەولوود چاوشئۆغڵو رایگەیاند ''جەنگی براكان رێگە بۆ ئازاری گەورە خۆشدەكات. مەزهەبگەرایی ئوممەتەكەمان دابەشدەكات. جەنگە ناوخۆییەكان و پێكدادانە چەكدارییەكان بوونەتە مایەی هەڕەشە بۆسەر ئاشتی و ئارامیمان. تیرۆر و شەپۆلە توندئاژۆكان سەقامگیريمان دەكەن ئامانج. لەئەنجامیشدا تەنها مسوڵمانە بێ تاوانەكان گەورەترین زیان دەكەن. ناتوانین ئەم دۆخە قبووڵ بكەین. ناتوانین لەبەرامبەر ئەم وێنەیەدا بێدەنگ بین''.
چاوشئۆغڵو لە ناوەندی كۆنگرەكان لە ئستانبوڵ، بەر لە دەستپێكردنی كارەكانی ١٣هەمین لووتكەی رێكخراوی هاریكاریی ئیسلامی، لە كۆبوونەوەی ئامادەكاریی ئەنجوومەنی وەزیرانی دەرەوەی وڵاتانی ئەندامی رێكخراوەكەدا گوتارێكی پێشكەش كرد.
مەولوود چاوشئۆغڵو ئاماژەی بەوەكرد هەموو جیهان پێویستی بە دادپەروەری و ئاشتی هەیە و جیهانی ئیسلامیش زۆرترین پێویستی بە یەكریزی و هاوپشتیی هەیە، هەر بۆیە ناونیشانی لووتكەكەی ئەمساڵیان وەك ''یەكریزی و هاوپشتیی لەپێناو دادپەروەری و ئاشتیدا'' دیاریكردووە و ئەو راگەیەنراوەش كە لە كۆتایی لووتكەكەدا بڵاودەكرێتەوە، هەڵوێستی هاوبەش سەبارەت بەو كێشانە دەخاتەڕوو كە ئاشتی، ئاسایش، سەقامگیری و خۆشگوزەرانی دەكەنە ئامانج و هەروەها بۆچوونێك سەبارەت بە كێشە گەردوونییەكان رادەگەیەنێت. چاوشئۆغڵو جەختی لەوەكردەوە یەكێك لە گرنگترین سەركەوتنەكانی لووتكەكە بریتی دەبێت لە دۆكیومێنتی ''بەرنامەی چالاكی رێكخراوی هاریكاریی ئیسلامی تا ساڵی ٢٠٢٥'' و لە رێگەی هاریكاری و هاوپشتییەوە دەگەینە ئەو ئامانجانە، بە گرنگییەوە باسی لەوەش كرد توركیا هەموو لێپرسراوێتییەك دەگرێتە ئەستۆ كە لەوبارەیەوە بكەوێتە سەر شانی.
لە گوتارەكەیدا وەزیری دەرەوەی توركیا باسی لە ناكۆكییەكانی نێوان مسوڵمانان كرد و گوتی: ''جەنگی براكان رێگە بۆ ئازاری گەورە خۆشدەكات. مەزهەبگەرایی ئوممەتەكەمان دابەشدەكات. جەنگە ناوخۆییەكان و پێكدادانە چەكدارییەكان بوونەتە مایەی هەڕەشە بۆسەر ئاشتی و ئارامیمان. تیرۆر و شەپۆلە توندئاژۆكان سەقامگیرمان دەكەن ئامانج. لەئەنجامیشدا تەنها مسوڵمانە بێ تاوانەكان گەورەترین زیان دەكەن. ناتوانین ئەم دۆخە قبووڵ بكەین. ناتوانین لەبەرامبەر ئەم وێنەیەدا بێدەنگ بین''.
مەولوود چاوشئۆغڵو جەختی لەوەكردەوە بۆچوونی مەزهەبگەرایی و ستەمكردن لەو كەسانەی خاوەنی بیروڕایەكی جیاوازن مایەی قبووڵكردن نییە وگوتى: ''ئەمە لە ئایینی ئێمەدا جێگەی نابێتەوە. پشتكردنە ئەوەی روودەدات تاوانە. لەناوبردنی ئاژاوەی مەزهەبگەرایی لێپرسراوێتی هەموومانە وەك مسوڵمانانە. لەوبارەیەشەوە داوا لە هەمووان دەكەین. با ئازارەكانی رابردوو لەبیربكەین و كار بۆ دڵخۆشی جیهانی ئیسلامی بكەین''.
چاوشئۆغڵو ئاماژەی بەوەشكرد كە بابەتی تیرۆر لەسەری سەرەوەی ئەو بابەتانەیە كە پێویستیان بە یەكریزی و هاوپشتیی هەیە و گوتی: ''تیرۆر ئایین، نەتەوە و مەزهەبی نییە'' و ئەركی هەموو مسوڵمانانە لەدژی بووەستنەوە".