ئیندۆنێزیا.. لافاو گیانلەدەستدانی نۆ کەسی لێکەوتەوە

جاکارتا - AA

رۆژنامەی کۆمپاس بڵاویکردەوە لە شەوی رابردووەوە بارانی بەلێزمە رووی لە چەند ناوچەیەکی ئیندۆنێزیا کردووە و بووەتە هۆی دروستبوونی لافاو لە شارەکانی جاکارتا، دێپۆك، بێکاسی، تانگێرانگ و بۆگۆر.

گوتەبێژی ئاسایشی جاکارتای پایتەخت، یوسری یونس رایگەیاند کە لافاوەکە کاریگەری نەرێنی لەسەر ژیانی هەزاران کەس دروستکردووە و بۆتە هۆی گیانلەدەستدانی نۆ کەس.

بەهۆی لافاوەکانیشەوە گەشتەکانی شەمەندەفەر دواکەوتن، هەروەها فڕۆکەخانەی هالیم پێرداناکوسوما لە رۆژهەڵاتی جاکارتا گەشتەکانی وەستاند.

لەو شارانەشی کە لافاو گرتوونیەتییەوە، سەدان خانوو و ئۆتۆمبێل ژێرئاو کەوتوون و رێگای نێوان شارەکانیش بەڕووی هاتوچۆدا داخراون.

بەرپرسانی ئەو وڵاتە هۆشداری ئەوەیان داوەتە هاووڵاتییان، پێشبینی دەکرێت بارانەکە تا سێ رۆژی دیکەیش بەردەوام بێت.

ئیندۆنێزیا یەکێکە لە وڵاتانی سەر هێڵی یەکسان و بەهۆی بارانی وەرزیەوە بەتایبەت لە مانگەکانی نیسان و تشرینی یەکەمدا زوو زوو رووبەڕووی لافاو دەبێتەوە.