ئەمریکا دوا ھاوکارییەکانی خۆی بۆ فەڵەستین رادەگرێت

نیویۆرک - AA

ئەمریکا دەستی کردووە بە راگرتنی پێدانی ھاوکاری مرۆیی بۆ دامەزراوەکانی کۆمەڵگەی مەدەنی فەڵەستینی کە بەمەبەستی بەستنی پەیوەندی باش لە نێوان ئیسرائیل و فەڵەستین ساڵانە بڕی ملیۆنان دۆلاری بۆ تەرخان دەکرا.

بەپرسانی ئێستا و پێشووی ئەمریکا بە رۆژنامەی New York Times -یان راگەیاندووە کە ئەمریکا لە چوارچێوەی راگرتنی ھەموو جۆرە ھاوکارییەک بۆ فەڵەستینییەکان، بڕیاری راگرتنی ھاوکاری بۆ گشت ئەو پرۆگرامانە دەرکردووە کە ئامانج لێیان بەھێزکردنی پەیوەندی نێوان گەلی فەڵەستین و ئیسرائیل بوون.

راشگەیندرا کە ئاژانسی گەشەپێدانی نێودەوڵەتی ئەمریکا، پرۆگرامی بەڕێوەبردنی شەڕ و پێکدادان و دامرکاندنەوەی، ھەروەھا پرۆگرامی Kids4Peace (منداڵان بۆ ئاشتی) لە نێو ئەو پرۆگرامانەدان کە ئەمریکا ھاوکاری خۆی لێیان بڕیووە.

بەرپرسان راشیانگەیاندووە کە تەنھا عەرەب و جوولەکەکانی ئیسرائیل دەتوانن سوود لە ھاوکارییەکانی ئەمریکا وەربگرن.

پێشتریش ئاژانسی گەشەپێدانی نێودەوڵەتی ئەمریکا رایگەیاندبوو کە بەھۆی بڕیاری راگرتنی ھاوکاری ئیدارەی ترەمپ بۆ فەڵەستین لە ئێستادا ناتوانن ھاوکارییەکان بگەیننە کەرتی غەززە و کەناری رۆژئاوا.