راگەیەنراوێک لە حیزبی دیموکراتی کوردستانەوە

هەولێر - AA

مەکتەبی سیاسی حیزبی دیموکراتی کوردستان لە راگەیەنراوێکدا زانیاری لەسەر تەقینەوەکەی ئەمشەوی بەردەم بارەگای مەکتەبی سیاسی حیزبەکەیان داوە و رایگەیاندووە کە لەم رووداوە ٥ پێشمەرگە و کارمەندێکی ئاسایش بوونەتە قوربانی.

حیزبی دیموکراتی کوردستان پارتێکی دژبەری ئێرانە و ماوەی زیاتر لە ٧١ ساڵە دژ بە دەوڵەتە یەکلەدوای یەکەکانی ئەم وڵاتە خەبات دەکات.

مەکتەبی سیاسی ئەم حیزبە رایگەیاندووە کە تەقینەوەکە لە دوای بەڕێوەچوونی رێوڕەسمێک بووە کە بۆ درێژترین شەوی ساڵ (شەوی یەلدا) و یادی لەدایکبوونی رێبەری ئەم حیزبە دکتور عەبدولرەحمان قاسملوو رێکخراوە. قاسملوو لە ساڵی ١٩٨٩ و رووداوێکی گوماناوی و لە کاتی دیالۆگ لەگەڵ بەرپرسانی ئێرانی لە ڤییەننای پایتەختی نەمسا تیرۆر کرا و بەرپرسانی دیموکرات قامکی تاوانیان بەرەو دەسەڵاتدارانی تاران راکێشا.

مەکتەبی سیاسی حیزبی دیموکرات لەم راگەیەنراوەدا هیچ لایەنێکی بە ئەنجامدانی ئەم کردەوەیە تاوانبار نەکردووە و رایگەیاندووە کە لێکۆڵینەوە لە رووداوەکە بەردەوام دەبێت و رای گشتی لە ئەنجامی لێکۆڵینەوەکان ئاگادار دەکردێتەوە.

ئەوەی خوارەوە دەقی راگەیەنراوەکەیە:

بۆ ئاگاداریی ڕای گشتی

تەقینەوەی تیرۆریستی لە نزیک یەکێک لە بنکەکانی ەفتەری سیاسیی حیزب، شەهیدو برینداربوونی ژمارەیەک لە تێکۆشەرانی حیزبی دیموکراتی کوردستانی لێ کەوتەوە.

ئەمشەو ٢٠ لە سەر ٢١ی دیسامبر (شەوی یەلدا)، دەوروبەری کاتژمێر١٠ی شەو لە کاتێک دا بەشدارانی ڕێورەسمی یادی لە دایکبوونی د.قاسملوو، بە دوای کۆتایی بەرنامەکە بۆ ماڵەکانیان دەگەڕانەوە، دوو تەقینەوەی بە دوای یەک لە نزیک پرسگەی بەر دەرکی قەڵای دیموکرات ڕوویان دا. بە هۆی ئەم تەقینەوەیە بە داخەوە ٦ کەس گیانیان لە دەست دا‌و ٤ کەسیش بریندار بوون.

شەهیدەکانی ئەم ڕووداوە بریتین لە:

1- عەلی قۆیتاسی، کادری حیزب

2- وەهاب میر خزری، پێشمەرگەی حیزب

3- سالار باقری، پێشمەرگەی حیزب

4- ئەرسەلان عەباس نیا، پێشمەرگەی حیزب

5- ناسر کەریمی، ئەندامی یەکیەتیی لاوانی دیموکرات،

6- عەدنان عەبدوڵلا، مفەوەزی ئاسایش

بە هۆی ئەم ڕووداوەوە دوو پێشمەرگەی حیزب و هەر وەها دوو پۆلیسی ئاسایشیش بریندار بوون.

وێڕای مەحکوومکردنی ئەو کردەوە تیرۆریستییە و هەر وەها سەرەخۆشی‌و هاودەردیی قووڵمان لە گەڵ بنەماڵەی شەهیدانی ئەو ڕووداوەو هیوای هەر چی زووتر چاکبوونەوە بۆ بریندارەکان، ڕادەگەیەنین کە لێکۆڵینەوە لە سەر چۆنیەتیی ڕووداوەکە بەردەوامە‌و، ئاسایش‌و دەزگا پێوەندیدارەکان لە شوێنی رووداوەکە حوزووریان هەیە. زانیاریی زیاتر لە راگەیەندراوەکانی داهاتوو دا بە ئاگاداریی بیرورای گشتی دەگەیەنین.

دەفتەری سیاسیی حیزبی دیموکراتی کوردستان

شەوی١٩ لە سەر ٢٠ی دیسامبری ٢٠١٦

شەوی ١ی بەفرانباری ١٣٩٥