روونكردنه‌وه‌ی پنتاگۆن سه‌باره‌ت به‌ منبج

واشنتۆن - AA

عه‌قید جۆن دۆریان، كه‌ یه‌كێكه‌ له‌ گوته‌بێژه‌كانی هاوپه‌یمانێتی نێودەوڵەتی دژبه‌ رێكخراوی تیرۆریستی داعش، پێشتر ئاماژه‌ی به‌وه‌ كردبوو كه‌ هێزی په‌یه‌ده‌/یه‌په‌گه‌ له‌ منبج بوونیان نییه‌، به‌ڵام دواتر ده‌ڵێت "ئه‌مڕۆ ده‌كشێنه‌وه‌".

دۆریان، له‌ به‌غداوه‌ له‌ڕێگه‌ی ڤیدیۆ كۆنفرانسه‌وه‌ سه‌باره‌ت به‌ دواین پێشهاته‌كانی سووریا وه‌ڵامی پرسیاری رۆژنامه‌نووسانی دایه‌وه‌ له‌ پنتاگۆن.

سه‌باره‌ت به‌ ده‌رچوون و ده‌رنه‌چوونی هێزه‌كانی په‌یه‌ده‌/یه‌په‌گه‌ له‌ منبج، په‌یامنێری ئاژانسی ئانادۆڵو پرسیاری له‌ دۆریان كرد كه‌ ئایا پێشتر گوتووتانه‌ له‌ منبج هیچ چه‌كدارێكی یه‌په‌گه‌ی لێنه‌بووه‌، ئه‌ویش له‌ وه‌ڵامدا گوتی به‌ڵێ راسته‌.

هاوكات تویتێكی نوێنه‌ری تایبه‌تی سه‌رۆكی ئه‌مریكا له‌ به‌ره‌نگاربوونه‌وه‌ی داعش، برێت مه‌كگۆرك وه‌بیر دۆریان هێنرایه‌وه‌ كه‌ له‌ ئه‌ژماری خۆی له‌ تۆڕی كۆمه‌ڵایه‌تی تویته‌ر بڵاوی كردۆته‌وه‌ و ده‌ڵێت "كاتێک چه‌كدارانی په‌یه‌ده‌/په‌كه‌كه‌ مه‌شق و راهێنانیان به‌هێزه‌ ناوخۆییه‌كان ته‌واو كرد شارۆچكه‌كه‌ جێده‌هێڵن"، ئه‌ویش له‌ وه‌ڵامدا گوتی: "گوته‌كانی مه‌كگۆرك پشتڕاست ده‌كه‌مه‌وه‌".

په‌یامنێره‌كه‌ له‌ دۆریان-ی پرسی ته‌واو له‌ روونكردنه‌وه‌كه‌ت تێنه‌گه‌یشتین، ئایا ئێستا له‌ منبج هێزی یه‌په‌گه‌ ماوه‌ته‌وه‌ یان نا، ئه‌ویش له‌ وه‌ڵامدا گوتی: "له‌و باوه‌ڕه‌دام نیم مابن، ئه‌وه‌ی من لێیتێگه‌یشتووم ئه‌وان ئه‌مڕۆ ده‌كشانه‌وه‌".

نوێنه‌ری تایبه‌تی باراك ئۆباما له‌ به‌ره‌نگاربوونه‌وه‌ی داعش، برێت مه‌كگۆرك له‌ تویتێكیدا رایگه‌یاندبوو: "باڵی چه‌كداری په‌یه‌ده‌، یه‌په‌گه‌ مه‌شق و راهێنانیان به‌ هێزه‌ ناوخۆییه‌كان كردووه‌ و، له‌گه‌ڵ ته‌واوبوونی ئه‌و قۆناغه‌دا هه‌موو هێزه‌كانی یه‌په‌گه‌ شارۆچكه‌كه‌ جێده‌هێڵن".

عه‌قید دۆریان، باسی له‌ ئۆپه‌راسیۆنی سوپای سووریای ئازاد كرد به‌ پشتیوانی توركیا بۆسه‌ر شاری ئه‌لباب و، گوتی: "پێموایه‌ سوپای سووریای ئازاد زۆر كه‌می ماوه‌ ئه‌لباب له‌ داعش پاكبكاته‌وه‌، هێشتا به‌ره‌و ناو ئه‌لباب هه‌نگاو ده‌نێت، كۆنترۆڵیان نه‌كردووه‌ته‌وه‌. به‌ڵام زۆر نزیكن لێیه‌وه‌".

دۆریان ئه‌وه‌یشی خسته‌ڕوو كه‌ هاوپه‌یمانێتی نێودەوڵەتی دژبه‌ داعش به‌شێك نییه‌ له‌ ئۆپه‌راسیۆنه‌كانی ئه‌لباب و، له‌و ناوچه‌یه‌دا پشتیوانی ئاسمانیی پێشكه‌ش به‌ ئۆپۆزسیۆن ناكات.

جۆن دۆریان جه‌ختی له‌سه‌ر ئه‌وه‌ كرده‌وه‌ كه‌ ئۆپه‌راسیۆنی ئه‌لباب هیچ زیانێكی بۆ ئۆپه‌راسیۆنی ره‌ققە نییه‌ و، ئاماژه‌ی به‌وه‌یش كرد كه‌ له‌ نێوان توركیا و هاوپه‌یمانێتی نێودەوڵەتیدا كۆبوونه‌وه‌ی دیپلۆماسی درێژه‌ی هه‌یه‌.