رەوشی تەندروستی مورسی تێکچووە

قاهیرە – AA

کوڕەکانی سەرکۆماری لەسەرکارلادراوی میسر، محەمەد مورسی رایانگەیاند کە رەوشی تەندروستی باوکیان کە لە زیندانی تۆرای باشووری قاهیرەی پایتەختی میسر بەندکراوە، بەرەو خراپی دەچێت.

کوڕە گەوڕەی مورسی ئەحمەد مورسی لە هەژماری تایبەتی خۆی لە تۆڕی کۆمەڵایەتی فەیسبووک، نووسیوویەتی: "وێڕای ئەوەی رەوشی تەندروستی باوکم کە چوار ساڵ و نیوە خراوەتە زیندان تێکچووە، بەڵام وەکو پێویست چارەسەری پزیشکی بۆ دابین نەکراوە"، لایەنە پەیوەندیدارەکانی میسریشی بە بەرپرسیار زانی لە گیانی باوکی.

هەروەها عەبدوڵڵا مورسی کوڕی بچووکی مورسیش بە پێویستی زانی کە باوکی بگوازرێتەوە نەخۆشخانەیەکی تایبەت و نەشتەرگەری بۆ بکرێ بەهۆی ئەوەی نەخۆشی شەکرەی ناوبراو تەشەنەی سەندووە و چاوی چەپی کێشەی بینینی هەیە.