هەولێر - AA فەخرەدین ئیبراهیم
زیاتر لە شەش مانگ بەسەر هەڵبژاردنە پێشوەختەکەی مانگی تشرینی یەکەمی ٢٠٢١ی عێراق تێپەڕی کە سەرەڕای ئەوەی رێژەیەکی کەم لە عێراقییەکان بەشدارییان تیادا کرد، بەڵام کاریگەریی خۆپیشاندانەکان کە هانی حکوومەتی عادل عەبدولمەهدی دا مل بدات بۆ هەڵبژاردنی پێشوەختە، تروسکایەکی چاکسازیی بۆ عێراقییەکان تێدابوو.
عێراقییەکان بە گومانی ئەوەی ئەمجارە رەوتێکی جیاواز بتوانێت جلەوی حکوومەت بگرێتە دەست و ژیانێکی شایستەتریان بۆ دابین بکات دەنگیان دا، بەڵام ناکۆکی و ململانێ و دەستوەردانی دەرەکی لە کاروباری عێراق، بووەتە کۆسپ لەبەردەم ئاواتی عێراقییەکان.
ململانێی لایەنە سیاسییەکانی عێراق، ئەمجارە لەنێوان نەتەوە و مەزهەبە جیاکان نەبوو، بەڵکوو ماڵی شیعە بەسەر دوو بەرەدا دابەش بوو، دۆخێک کە نیگەرانی ئێرانی لێکەوتووەتەوە و هانی ئەو وڵاتە دەدات زیاتر لە جاران دەست لە کاروباری عێراق وەربدات.
مامۆستا لە کۆلێژی زانستە سیاسییەکان سەربە زانکۆی سەڵاحەددین، پرۆفیسۆر دکتۆر ساڵح عومەر عیسا پێی وایە کە "هۆکاری چەقبەستووی پڕۆسەی سیاسیی لە عێراق لایەنە شیعەکانی نزیک لە ئێرانن و هەر بۆیەش ئێران دەیەوێت کۆدەنگییەک لەنێوان لایەنە سیاسییە شیعەکان دروست بکات"، ئەمە جگە لە نیگەرانی بۆ ئێرانییەکان، هانیان دەدات کە دەست لە کاروباری هێزە سیاسییەکان لە عێراق وەربدەن بە جۆرێک وەک بەڕێوەبەری کۆمپانیای شیکار بۆ توێژینەوە و راپرسی، رابەر تەلعەت دەڵێت "ئێران قوڵایی ستراتیجیی خۆی لە عێراقدا دەبینێت و بە مافی خۆشی دەزانێت کە دەست لە کاروباری عێراقدا وەربدات".
ئەگەرچی پرۆفیسۆر دکتۆر ساڵح عومەر عیسا نایشارێتەوە کە ئێران رۆڵی هەیە لە هەموو کایەیەکی سیاسی عێراقدا، بەڵام پێی وایە ، ئەوە کارەکتەرە سیاسییە عێراقییەکانن کە لەگەڵ یەکتر نەگونجاون.
رابەر تەلعەت کە خاوەنی چەندین توێژینەوەیە لە بوارە جیاجیاکانی بیر و هزری شیعە و رۆڵیان لە دەسەڵاتی سیاسی عێراقدا، بۆ ئاژانسی ئانادۆڵو گوتی: "رۆڵی ئێران رۆڵێکی کاریگەر و یەکلاییکەرەوەیە، ئێران بۆخۆی ئەمەی نەشاردووەتەوە، هێزە سیاسییەکانی عێراق ئەمەیان نەشاردووەتەوە کە ئەگەر بڕیاربێت حکوومەتی عێراقی دروست بێت، دەبێت حکوومەتێک بێت کە رەزامەندی ئێرانی لەسەر بێت".
بە بڕوای ئەو توێژەرە سیاسییە، پاشەکشەی ئەمریکا لە ناوچەکە جێی بۆ ئێران خۆش کردووە کە کاراتر لە جاران لە کایەی سیاسیی عێراقدا رۆڵ ببینێت.
رابەر تەلعەت لەم بارەیەوە دەڵێت "لە حاڵەتی پاشەکشەی ئەمریکا بەتەواوەتی لە ناوچەکە، ئەم گۆڕەپانە بەتەواوەتی دەکەوێتە ژێر هەژموونی ئێرانەوە. بۆیە ئێران لە رێگای هێزە شیعەکانەوە، هەروەها لە رێگای هاوپەیمانەکانییەوە بەتایبەتی دوای شەڕی داعش ئەو هەموو پشتگیری و رۆڵەی کە هەیبووە لە پشتگیریکردنی شیعە و چەکدارانی حەشدی شەعبی، خاوەنی رۆڵێکی بەرچاوە بەسەر نەخشەی سیاسیی عێراقدا، ئەگەریش باس لە قوڵایی ستراتیجیی جیوپۆلەتیک بکەین ئەوا ئێران ئەمە بە مافێکی خۆی دەزانێت، پاراستنی نفوزی خۆی لەناو عێراق بە مافێکی خۆی دەزانێت بۆ پاراستنی ئاسایشی نەتەوەیی خۆی".
- ناکۆکییەکان لەنێو ماڵی شیعە تێگەیشتنی موقتەدا لە حوکمڕانی
رابەر تەڵعەت دەڵێت "ناکۆکییەکانی نێو ماڵی شیعە زۆر زەقە، ئەم ناکۆکییانە پەیوەندی بە ئەمڕۆوە نییە، بەڵکو ئەگەر سەیر بکەین لە هەموو هەڵبژاردنەکانی ٢٠٠٥-٢٠١٠-٢٠١٤ – ٢٠١٨ تا دوا هەڵبژاردن، هەمیشە لە هەر هەڵبژاردنێکدا نێو ماڵی شیعە دوو کوتلەی لێ بووەتەوە، واتا ئەم بەردەوام جیابوونەوە و هەڵوەشانەوەیە هەبووە، ئەگەر سەیری ٢٠٠٥ بکەیت شیعە سێ کوتلەبوون، ئێستا حەوت بۆ هەشت کوتلەن، ئەمەش پەیوەندی بە ئیدارە و تێگەیشتنی ئەم کوتلانە هەیە بۆ ئیدارەدانی بەرژەوەندییەکانی خۆیان".
ئەو قوڵتر دەڕوانێت و لەبارەی رۆڵی حەوزەی عیلمی لە نەجەفیش قسە دەکات و دەڵێت "پێموایە حەوزە ئەوەی تا ئێستا لە نەجەف هەبووە، رۆڵی بەرهەمهێنانی پاڵپشتی رۆحی و فکرییە بۆ ئەو رەوتە شیعیزمەی لە دونیادا هەبووە، جا ئەمە لە قوم بێت یان لە نەجەف بێت، دواجار حەوزە هەوڵدەدات کە لە رووی مەعنەوییەوە پشتگیری لە رەوتی شیعە بکات کە لە دونیا یان لە ناوچەکەدا سەردەستە جا لە ئێران، لوبنان، سووریا و یەمەن بەگشتی، من پێموایە (حەوزە و مەرجەعیەتی شیعە لە نەجەف) تا ئێستا راستەوخۆ جگە لە پشتگیری لە گەشەپێدانی ئەم رەوتە سیاسییە، هیچ بەشدارییەکی لە ناکۆکییە سیاسییەکاندا نییە بەڵکو حەوزە ئەم ناکۆکییانەی بەجێهێشتووە بۆ ئەم لایەنە سیاسییانە، بەڵام لە قۆناغی جیاجیادا بۆ نموونە ئەو کاتەی وڵات پێویستی بە فەتوای حەوزە هەبووە وەک بابەتی دروستبوونی حەشدی شەعبی کە بینیمان لە نەجەف فەتوا درا کە خەڵك چەک هەڵگرن بەرامبەر ئەم هەڕەشەیە، بۆیە دەبینین تەنیا لە چەند فەقەڕەی جیاوازدا حەوزە راستەوخۆ بەشداری کردووە".
بە بڕوای رابەر تەڵعەت، ناکۆکییەکە کاتێک گەیشتووتە لووتکە و لێدان لە بەرژەوەندییەکانی هەندێک لایەن کە دژبە دەستوەردانی مەراجعی ئایینی شیعەی عێراقین لە کاروباری حوکمڕانی عێراقدا کە سەدر بڕیاری داوە خۆی و مەرجەعیەتەکەی بکێشێتە ناو سیاسەت و حوکمڕانی وڵات لە ئەستۆ بگرێت. ئەو توێژەرە لەم بارەیەوە دەڵێت "تێگەیشتنی موقتەدا سەدر بۆ ئیدارەدانی پڕۆسەی سیاسیی لە عێراق، بەتەنیا تێگەیشتنێکی سیاسیی و حوکمڕانی نییە، بەڵکو تێگەیشتنێکی ئایینیشی هەیە بۆ ئیدارەی دەوڵەت، سەدر پێیوایە کە رۆڵی حەوزە نابێت سامیتە بێت بەو مانایەی کە کەمترین دەستوەران لە کاروباری سیاسیی دەوڵەتدا هەیە، بەڵکو پێیوایە کە دەبێت حەوزە ناتیقە بێت، واتا دەیەوێت رۆڵێکی بەرچاوی هەبێت لە ئیدارەی دەوڵەت لە داڕشتنی سیاسەت و ئاراستەکردنی حوکمڕانی بەرەوباشتر، بۆیە سەدر خۆی بە دەستپێشخەری ئەم رەوتە دەزانێت و پێیوایە کە حەوزە دەتوانێت کاریگەرییەکی باشتر و گرنگتری هەبێت لە ئیدارەی سیاسیی".
هەروەها مامۆستا لە کۆلێژی زانستە سیاسییەکان سەربە زانکۆی سەڵاحەددین، پرۆفیسۆر دکتۆر ساڵح عومەر عیسا دەڵێت "لەنێوان سەدر و مالکی ناکۆکییەکی یەکجار زۆر هەیە و سەدر بەشێوەیەک تەماشای پرۆسەی سیاسی دەکات کە نابێت مالکی رۆڵی تێدا هەبێت و لە بەرامبەریشدا مالکی-یش هەوڵ دەدات کە رۆڵێکی سەرەکی هەبێت لەناو پڕۆسەی سیاسی عێراقدا ئەوە بووەتە هۆکاری ئەوەی کە لایەنی دەرەکیش بێتە ناو کایەکەوە".
بە تێڕوانینی پرۆفیسۆر دکتۆر ساڵح عومەر عیسا "ئێران پاڵپشتی لە مالکی دەکات و دەیەوێت کە نوری مالکی لە پرۆسەی سیاسی نەچێتە دەرەوە". ئەو پێی وایە کە هەرگیز نە ئێران و نە خودی مالکی بەوە ڕازی نابێت کە لە دەرەوەی بازنەی حوکمڕانی عێراق بێت و ئەوەش دەبێتە هۆی قوڵبوونەوەی کێشەکان و چەقبەستوو مانەوەی دۆخەکە، دەشڵێت "هەڵبژاردنەوەی دووبارەش کێشەکە چارەسەر ناکات، چونکە لە ئەگەری هەڵبژاردنیشدا هیچ لایەنێک نییە کە دەنگی زۆرینە بە دەست بێنێت و ٢٢٠ ئەندام پەرلەمان بە دەست بێنێت".
رابەر تەڵعەت لە رەهەندێکی دیکەوشە سەیری ناکۆکییەکانی نێو ماڵی شیعە دەکات و دەڵێت "لەدوای ساڵی ٢٠٠٣ واتە دوای دروستبوونی عێراقی تازە، بابەتی دیموکراسی تەوافوقی لە عێراق هاتە ئاراوە، ئەویش لەدوای شەستەکانی سەدەی رابردوو لە زۆرێک لە وڵاتانی رۆژئاوا وەک بەلجیکا، هۆڵەندا و وڵاتانی دیکەش جێبەجێ کراوە، ئەم جۆرە دیموکراسییە تەوافوقییە بۆ ئەو وڵاتانە دەبێت کە زیاد لە پێکهاتەیەکیان هەیە، ئەم پێکهاتانە لەسەر بنەمای دیموکراسی زۆرینە نا، بەڵکو لەسەر بنەمای دیموکراسییەک کە بە تەوافوق مافی هەموو پێکهاتەکان لە بەشداری سیاسی لە دروستکردنی ئیئتیلافێکی فراوان بە سەرکردایەتی هەموو پێکهاتەکان، بە بەشداری لە سەرەوەت و سامانی دەوڵەتدا، ئیدارەدانی کاروباری ناوخۆی ئەم پێکهاتانە لەلایەن خۆیانەوە لە رووی دەستووری و یاساییەوە پارێزراو بێت، ئەمە وەکو سیستەم تا ئێستا لە وڵاتان کاری پێ دەکرێت و سەرکەوتوو بووە".
هۆکاری شکستی ئەو بنەمایە لە عێراق بە بڕوای ئەو توێژەرە سیاسییە بۆ شێوەی سەرەتای حوکمڕانی نوری مالکی لە عێراق دەگەڕێتەوە.
رابەر تەڵعەت دەڵێت "لەدوای ٢٠٠٩ کەسێکی وەکو نوری مالکی دەستپێشخەری یەکەم بوو لە تێکدانی تێگەیشتن لە تەوافوق و دەستی بە بانگەشەی پێکهێنانی حکوومەتی زۆرینە کرد، بە تێگەیشتنی ئەو، حکوومەتی زۆرینە دەبێت لەو حزبە شیعە بێت کە زۆرترین دەنگی بەدەستهێناوە یان ئەو پێکهاتەیە بێت کە زۆرترین ژمارەی دانیشتووانی لە عێراق هەیە، ئەمە سەرەتای تێکدانی تێگەیشتن بوو لە بونیاد و مەفاهیمی تەوافوقی کە عێراقی تازەی لەسەر دامەزرابوو، ئەمە بووە سەرەتایەک بۆ لێکدوورکەوتنەوەی هەم ناو ماڵی شیعە، هەم دوورکەوتنەوەی سوننە لە پرۆسەی سیاسیی، هەم توڕەبوونی کورد لە پڕۆسەی سیاسیی، چونکە دەزانین ئەم دوورکەوتنەوە و دابەشبوونە لە ساڵی ٢٠٠٩ کە نوری مالکی دەستی پێ کرد، لەگەڵ هێزە کوردییەکان و لەگەڵ شیعەکان و هێزە سوننەکان بەردەوام درێژەی کێشا تا هەڵبژاردنی رابردوو. لەم هەڵبژاردنەدا، هێزەکان بەتایبەتی کەسێکی وەک موقتەدا سەدر کە لە دوای ٢٠١٦ ئەو هێزە بوو کە چووە پاڵ خۆپیشاندانەکانی شەقام، باوەڕی وایە کە سیستەمی عێراق ئیتر بەشێوەی ئەم تەوافوقییە نابێت کە تیایدا ئامانج پاراستنی بەرژەوەندی هێزەکانە، بەرژەوەندی وڵاتانی دەورووبەر و هەرێمییە، بە تایبەت وڵاتێکی وەکو ئێران کە کاریگەری گرنگیی هەیە بەسەر پێکهاتەی شیعە لەناو عێراقدا، هەروەها عێراق و ئێران هەمیشە گۆڕەپانێکی گرنگی رەوتی ستراتیژی بووە بەتایبەت لە بەربەرەکانێ لەگەڵ رۆژئاوا و ئەمریکادا، ئیتر سەدر لەم باوەڕەدایە کە ئەم ئیتیلافە فراوانە نیشتمانییە ناتوانێت وەڵامدەرەوەی کێشەکانی عێراق بێت، ناتوانێت گەندەڵی چارەسەر بکات و ناتوانێت خزمەتگوزاری دابین بکات، ناتوانێت ئاسایش و سەقامگیریی بۆ عێراقییەکان دابین بکات".
- جارێکی دیکە گەڕانەوە بۆ ئێران، رۆڵ و کاریگەریی لە پێکهێنانی حکوومەتدا
سەرئەنجام هەڵبژاردنی پێشوەختەی عێراق ئەنجام درا، هەڵبژاردنێک کە بەپێی ئامارە سەرەتاییەکان کەمترین رێژەی بەشداربوونی خەڵکی تێدا بووە کە بەگوتەی پرۆفیسۆر دکتۆر ساڵح عومەر عیسا "لە زۆرێک لە پارێزگاکانی عێراق رێژەی بەشداری خەڵک لەسەدا ٣٠ کەمتر بووە. ئەوەش نیشانە لە نەبوونی متمانەی گشتی عێراقییەکانە بە کارەکتەرە سیاسییەکانیان".
لەگەڵ ئەوەشدا دەرئەنجامی هەڵبژاردنەکان پەسەند کرا و یەکەم دانیشتنی ئەنجوومەنی نوێنەران لە نۆی کانوونی دووەم ئەنجام درا. لە پرۆسەیەکدا دەستەی سەرۆکایەتی ئەنجوومەنەکە بەپێی رێککەوتنی نێوان سەدر، بارزانی و سوننە هەڵبژێردران و ماوەی هەڵبژاردنی سەرکۆمار و دواتر راسپاردنی پێکهێنانی حکوومەت لەلایەن سەرکۆمارەوە بۆ فراکسیۆنی زۆرینەی پەرلەمانی.
پرۆسەکە لێرە گرێی تێکەوت و ناکۆکی نێوان شیعەکان رێگر بوو لە تەواوکردنی رێژەی یاسایی ئەندامان. شیعە بەسەر دوو بەرەدا دابەش بوو، موقتەدا سەدر و نوری مالکی.
سەدر بانگەوازی زۆرینەی نیشتمان و نوری مالکی وەڵامدانەوەکەی بە رێککەوتنی نیشتمانی بوو. لە راستیدا سەدر دەیەوێت بڵێت، هێزە براوەکانی هەڵبژاردن حکوومەت پێک بهێنن و نوری مالکی و هاوپەیمانەکانی کە دۆڕای هەڵبژاردنەکە بوون، ئەوە رەت دەکەنەوە. ئەگەرچی نوری مالکی سەدر بە تێکدانی "تەوافقی نیشتمانی" تاوانبار دەکات، بەڵام بە تێگەیشتنی رابەر تەڵعەت "تێگەیشتنێکی هەڵە هەیە لە خوێندنەوەی تەوافوق، چونکە لە بنەڕەتدا کێشە لە خودی سیستەمی تەوافوقدا نییە. کێشە لە خودی سیستەمی ئەو حکوومەتانەشدا نەبووە، بەڵکو کێشە لەوەدایە ئەو هێزانەی کە تا ئێستا لە عێراقدا چوونەتە ناو حکوومەتەوە، حکوومەتیان بەکارهێناوە بۆ بەرژەوەندی خۆیان، بۆ پاراستنی بەرژەوەندی وڵاتانی هەرێمی، بۆ ئیدارەدانی بەرژەوەندی و شەڕی بە وەکالەتی وڵاتانی هەرێمی، بۆ درێژکردنەوەی گەندەڵی و پاراستنی بەرژەوەندی و کەڵەکەکردنی سامان و سەرمایەی خۆیان لە سایەی حکوومەتدا".
رابەر تەلعەت رەخنە لە دەسەڵاتدارانی شیعەی پێشووی عێراق دەگرێت و دەڵێت "٢٠ ساڵ حوکمڕانی شیعە پشتی بەست بە هێزی هەرێمییەوە. بەرژەوەندی دەرەکی بەڕێوەیان دەبات. خۆیان خاوەنی سەرچاوە و سامانی زۆرن، سەرچاوەی ناوخۆییان بەدەستەوەیە، دەستیان لە بازرگانی و بەکارهێنانی سەرچاوەی سروشتی عێراقدا هەیە، خاوەنی چەکدارن و بەشداریشن لە حکوومەتدا".
پرۆفیسۆر دکتۆر ساڵح عومەر عیسا لەبارەی ئەگەری رێککەوتنی شیعەکان لە عێراق و پێکهێنانی حکوومەت لەسەر بنەمای دەرئەنجامی هەڵبژاردنەکان گوتی: "هیچ کاتێک لە عێراق حکوومەت بەپێی دەرئەنجامەکانی هەڵبژاردن پێک نەهاتووە و لە دەرەوەی پەرلەمان رێککەوتن کراوە، بەڵام پێشتر رێککەوتنە سەرەکییەکە لەنێوان ئێران و ئەمریکا دەکرا".
ئەگەرچی پرۆفیسۆر دکتۆر ساڵح عومەر عیسا پێی وایە کە سەرئەنجام رێککەوتن دێێتە ئاراوە و عێراق لەو چەقبەستووە دێتە دەرەوە، بەڵام دەشڵێت "ناکۆکییەکانی ئەمریکا و ئێرانیش لەسەر پرۆگرامی ئەتۆمی کاریگەری لەسەر دۆخی عێراق هەبووە و متمانەیان بە یەکتر نییە کە بە چ شێوەیەک لە پرۆسەی سیاسی عێراقدا بەیەکەوە کار بکەن".
- دادگای باڵای فیدراڵیی وەک هۆکارێکی دیکەی قەیرانەکە
دەستوەردانی دەرەکی کە خاڵی زەقی ناکۆکی نێوان لایەنە سیاسییەکانیشە، بە تەنیا بەس نییە بۆ وردبوونەوەی لە هۆکاری چەقبەستوویی سیاسی لە عێراق، رەنگە هەڵە نەبێت ئەگەر بگوترێت کە دادگای باڵای فیدراڵیش لە عێراق کە باڵاترین مەرجەعی دەستووریی وڵاتە، هۆکارێک بووە لە بنبەستە سیاسییەکەی کە تووشی عێراق بووە، بەڵام ئاخۆ ئەم دادگایە چۆن، کەی و لەژێر کاریگەری چ لایەنێک پێکهاتووە و دەسەڵاتی پێدراوە کە ئێستا دەرچوون لە بڕیارەکانی ئەستەمە.
لەم بارەیەوە رابەر تەلعەت گوتی: "رێگریی یاسایی هەیە کاتێک دادگای دەستووریی بڕیاری دا بە دانیشتنی دوو لەسەر سێی پەرلەمان پێویستی بە تێپەڕاندنی هەر پۆستێکە، ئێستا کێشەکە لەوەدایە سەدر و هاوپەیمانەکانیشی دووجارە شکست دەهێنن لە تەواوکردنی ئەم رێژە یاساییە کە ٢٢٠ پەرلەمانتاری پێویستە بۆ ئەوەی بتوانن سەرکۆمار دیاری بکەن، کەواتا لێرەشدا دابەشبوونەکە بە جۆرێکە کە هەردوولایان ناتوانن ئەم رێژە یاساییە یان تێکی بشکێنن یان تەواوی بکەن، ئەمە لە رووی یاسایی و دەستوورییەوە بەربەستە".
دادگای باڵای فیدراڵی لە عێراق بە پشتبەستن بە رێساکانی ماددەی ٤٤ لە یاسای ئیدارەدانی دەوڵەتی عێراقی بۆ قۆناغی راگوزەر بەشی دووەم لە هاوپێچەکەی لەسەر رەزامەندی ئەنجوومەنی سەرۆکایەتی حوکم/ئەنجوومەنی وەزیران دامەزراوە بە ژمارە ٣٠ ساڵی ٢٠٠٥. دادگاکە پێکهاتووە لە سەرۆک و جێگر و حەوت ئەندام. بەپێی ئەو رێککەوتنەی کە هەر ئەو کات لەژێر هەژموونی دەسەڵاتی سیاسیی شیعەی عێراقدا کراوە، دادگاکە بەسەر شیعە (٥ ئەندام)، سوننە (٢ ئەندام) و کورد (٢ ئەندام) دابەش کراوە.
وەک پرۆفیسۆر دکتۆر ساڵح عومەر عیسا باسی دەکات "دادگای فیدراڵیش رۆڵی هەبوو لەو قەیرانە. پێشتر هەر هەمان دادگا شرۆڤەیەکی دیکەی هەبوو، بەڵام ئێستا شرۆڤەی ئەو بۆ دەستووری عێراق لەبارەی هەڵبژاردنی سەرکۆماری کە باس لە مەرجی ئامادەبوونی دوو لەسەر سێی ئەندامانی ئەنجوومەنی نوێنەران دەکات. بە دڵنیایییەوە ئەم پەرتەوازییەی کە لە پرۆسەی سیاسی عێراقدا هەیە ٢٢٠ کەس بە ئاسانی کۆنابنەوە مەگەر بتوانن کە رێککەوتنێکی سیاسی لە دەرەوەی پەرلەمان دروست بکەن".
ئەگەرچی چاودێرانی سیاسیی و هەموو ئەوانەی کە ئەزموونی دۆخی سیاسیی عێراقیان لە دوو دەیەی رابردوودا بینیوە دەزانن کە سەرئەنجام هەموو عێراقییەکان ئەگەر پێویست بێت لەژێر گوشاری بەرژەوەندە دەرەکییەکان ناچارن رێکبکەون، بەڵام ئەوە بێ وەڵام دەمێنێتەوە، چارەنووسی دەنگ و متمانەی عێراقییەکان بە کارەکتەرە سیاسییەکان و ویستیان بۆ شێوازی حوکمڕانی وڵاتەکەیان کە ئەوە خواستە جێی خۆی بە بڕیاری سیاسی وڵاتان گۆڕیوەتەوە.
news_share_descriptionsubscription_contact
