قەیرانی سیخوڕیکردن لەنێوان ئیتاڵیا و رووسیا

رۆما- AA

لەنێوان ئیتاڵیا و رووسیا قەیرانێکی نوێ دەستیپێکرد، ئەویش قەیرانی سیخوڕییە.

بەگوێرەی ئەو هەواڵانەی لە راگەیاندنەکانی ئیتاڵیا-دا بڵاوکراونەتەوە لە چوارچێوەی دۆسیەیەکی لێکۆڵینەوەی سەرۆکایەتی داواکاری گشتیی رۆما، دەزگای هەواڵگری ئیتاڵیا و هێزە ئەمنییەکان، ئێوارەی دوێنێ لە ئۆپەراسیۆنێکدا کارمەندێکی باڵیۆزخانەی رووسیا لە رۆما و ئەفسەرێکی ئیتاڵییان دەستگیرکردووە.

باس لەوەشکراوە کە ئەفسەرە ئیتاڵییەکە لە کاتی تاوانەکەدا و کاتێک لە بەرامبەر پارە کۆمەڵێک زانیاری و بەڵگەی نهێنی بە کارمەندەکەی باڵیۆزخانەی رووسیا داوە، دەستگیرکراوە.

هەواڵەکان باس لەوە دەکەن کە ئەفسەرە ئیتاڵییەکە پێشتر لە ریزی هێزە دەریاییەکاندا فەرماندەی کەشتی بووە و لەئێستاشدا بەتۆمەتی سیخوڕی و دروستکردنی مەترسی لەسەر ئاسایشی دەوڵەت دەستبەسەرە و لێکۆڵینەوەش لە پێگەی دیپلۆماسی کارمەندە رووسەکە دەکرێت.

هەر لەسەر ئەم پێشهاتانە وەزارەتی دەرەوەی ئیتاڵیا راگەیەندراوێکی بڵاوکردەوە و تیایدا ئەوە خراوەتەڕوو کە باڵیۆزی رووسیا لە رۆما بانگێشت کراوە.

ئەم قەیرانەش لە دوای شەڕی ساردەوە تا ئێستا گەورەترین قەیرانە لەنێوان مۆسکۆ و رۆما روویدابێت.