لۆدریان: "مه‌ترسیی سه‌رهه‌ڵدانه‌وه‌ی داعش هه‌یه‌"

هه‌ولێر - AA
وه‌زیری ده‌ره‌وه‌ی فه‌ڕه‌نسا له‌پاش به‌غدا سه‌ردانی هه‌رێمی كوردستانی كرد و رایگه‌یاند په‌یوه‌ندیی فه‌ڕه‌نسا و كورد له‌ مێژینه‌یه‌ و پێشمه‌رگه‌ رۆڵی كاریگه‌ریی هه‌بوو له‌شه‌ڕی دژ به‌ داعش.
وه‌زیری ده‌ره‌وه‌ی فه‌ڕه‌نسا، جان ئیڤ لۆدریان كه‌ دوێنێ دووشه‌ممه‌ له‌ پاش سه‌ردانێكی ره‌سمی بۆ به‌غدا سه‌ردانی هه‌رێمی كوردستان كرد و له‌ شاری هه‌ولێر چه‌ند كۆبوونه‌وه‌یه‌كی له‌گه‌ڵ ژماره‌یه‌ك له‌ به‌رپرسانی هه‌رێم به‌ست له‌ كۆنگره‌یه‌كی رۆژنامه‌وانییدا ئه‌مڕۆ سێشه‌ممه‌ رایگه‌یاند "ئه‌وه‌ بۆ جاری شه‌شه‌مه‌ سه‌ردانی هه‌رێمی كوردستان ده‌كه‌م پاش ئه‌وه‌ی بووم به‌ وه‌زیر، پێشتر وه‌كو وه‌زیری به‌رگریی و ئێستا وه‌كو وه‌زیری ده‌ره‌وه‌. له‌ كۆبوونه‌وه‌كانماندا چاومان كه‌وت به‌ سه‌رۆكوه‌زیرانی هه‌رێم، نێچیرڤان بارزانی و جێگری سه‌رۆكی حكوومه‌ت، قوباد تاڵه‌بانی، هه‌روه‌ها له‌گه‌ڵ راوێژكاری ئه‌نجوومه‌نی ئاسایشی هه‌رێم مه‌سرور بارزانی و دواتر لەگەڵ به‌ڕێز مه‌سعود بارزانی-یش كۆبووینه‌وه‌".
ئەو گوتیشی: "ناونیشانی سه‌ردانه‌كه‌ی دۆستایه‌تی و وه‌فاداریی و رێزگرتنه‌ بۆ كورد و كوردستان، چونكه‌ جاران كه‌ سه‌ردانی هه‌رێمی كوردستانم ده‌كرد داعش زۆر نزیك بوو و رووبه‌ڕێكی فراوانی له‌ژێر ده‌ستتدا بوو و هێزه‌كانی پێشمه‌رگه‌ له‌گه‌ڵ داعش له‌شه‌ڕدابوون، پێشمه‌رگه‌ رۆڵێكی زۆر كاریگه‌ری بینی له‌ شه‌ڕی دژ به‌ داعش، رێزم بۆ كورد و كوردستان هه‌یه‌ و په‌یوه‌ندیی كورد و فه‌ڕه‌نسا له‌ مێژینه‌ن و له‌هه‌مان كاتدا په‌یوه‌ندییه‌كانی به‌ڕێز مه‌سعود بارزانی له‌گه‌ڵ سه‌رۆكه‌كانی فه‌ڕه‌نسا زۆر باش بوون و منیش په‌یوه‌ندییه‌كانی باشم له‌گه‌ڵ به‌ڕێز بارزانی هه‌یه‌".
وه‌زیری ده‌ره‌وه‌ی فه‌ڕه‌نسا، جان ئیڤ لۆدریان له‌درێژه‌ی قسه‌كانیدا له‌و كۆنگره‌ رۆژنامه‌نووسییه‌ی ئه‌مڕۆ سێشه‌ممه‌ گرێی دا باسی له‌وه‌كرد كه‌ هه‌لومه‌رجی له‌بار بۆ ده‌ستپێكردنه‌وه‌ی گفتوگۆی باشتر له‌ نێوان به‌غدا و هه‌رێمی كوردستان هاتووه‌ته‌ ئارا و له‌مباره‌یه‌وه‌ گوتی: "په‌یوه‌ندییه‌كانی نێوان هه‌ولێر و به‌غدا ئێستا زۆر باشترن له‌ پێشتر، پاش به‌ڕێوه‌چوونی هه‌ڵبژاردن بۆ په‌رله‌مانی نوێی عێراق و هه‌رێمی كوردستانیش ئێستا حكوومه‌تێكی نوێی فیدڕاڵیی له‌ به‌غدا دروست بووه‌ و له‌ داهاتووی نزیكدا له‌ هه‌رێمی كوردستانیش حكوومه‌تێكی نوێ دروست ده‌بێت".
جان ئیڤ لۆدریان هه‌روه‌ها تیشكی خسته‌ سه‌ر بارودۆخی ناوچه‌یی و نێوده‌وڵه‌تیش و له‌مباره‌یه‌وه‌ رایگه‌یاند "ئێستا هه‌لومه‌رجی باش هه‌ن بۆ ئه‌وه‌ی دیالۆگێكی ئه‌رێنی و باش له‌ نێوان حكوومه‌تی هه‌رێم و حكوومه‌تی عێراق ده‌ست پێ بكاته‌وه‌، به‌ شێوه‌یه‌ك له‌ شێوه‌كانیش بارودۆخی ناوچه‌یی و نێوده‌وڵه‌تی زۆر گونجاوه‌ له‌ روویه‌كدا و له‌ روویه‌كی دیكه‌ بارودۆخه‌كه‌ ئاڵۆز بووه‌ به‌گشتی".
جان ئیڤ لۆدریان زیاتر روونكردنه‌وه‌ی دا و گوتی: "بارودۆخه‌كه‌ گونجاوه‌، چونكه‌ ئێستا داعش نه‌ماوه‌ و هیچ ناوچه‌یه‌كی له‌ژێر ده‌ست نییه‌، به‌ڵام مه‌ترسی ئه‌وه‌ هه‌یه‌ جارێكی دیكه‌ داعش سه‌رهه‌ڵبداته‌وه‌، بارودۆخه‌كه‌ش ئاڵۆزه‌ چونكه‌ ئه‌گه‌ری ئه‌وه‌ هه‌یه‌ دیسانه‌وه‌ ناسه‌قامگیری ئه‌م ناوچه‌یه‌ بگرێته‌وه‌، به‌تایبه‌ت ره‌نگه‌ له‌ باكووری رۆژهه‌ڵاتی سووریاوه‌ ده‌ست پێ بكات و ده‌بێت رێككه‌وتنی سیاسی هه‌بێت و چاره‌سه‌ری سیاسی هه‌بێت بۆ ئه‌وه‌ی ئه‌و مه‌ترسییه‌ نه‌مێنێت، له‌سه‌ر ئه‌م بابه‌تانه‌ زۆر به‌درێژی قسه‌مان كرد، له‌هه‌مان كاتدا زۆر باسی بابه‌ته‌كانی دیكه‌مان كرد كه‌ ده‌بێت عێراقی داهاتوو عێراقێكی فیدڕاڵی و دیموكراتی بێت و رێز له‌هه‌موو پێكهاته‌كان بگرێت".
جان ئیڤ لۆدریان هه‌روه‌ها سوپاسی هه‌رێمی كوردستانیش كرد كه‌ چه‌ند ساڵێكه‌ پێشوازیی له‌ سه‌دان هه‌زار ئاواره‌ی ناوچه‌كانی دیكه‌ی عێراق كردووه‌ و رایگه‌یاند "له‌هه‌مان كاتدا سه‌رسامی خۆم بۆ ده‌سه‌ڵاتدارانی هه‌رێمی كوردستان بۆ ئه‌و پێشوازییه‌ی له‌ چه‌ند ساڵی رابردوو له‌ په‌نابه‌رانییان كردووه‌ ده‌ربڕیوه‌ و خه‌ڵكی هه‌رێمی كوردستانیش زۆر هاوكار بوون بۆ پێشوازیی له‌و ژماره‌ زۆره‌ی ئاواره‌ و ئه‌مه‌ش نموونه‌یه‌كی زۆر باشه‌ و ده‌بێت هه‌موومان په‌ندی لێوه‌ربگرین".
ناوبراو كه‌ له‌م سه‌ردانه‌یدا بۆ عێراق و هه‌رێمی كوردستان سه‌رۆكی لێژنه‌ی كاروباری ده‌ره‌وه‌ له‌ په‌رله‌مانی فه‌ڕه‌نسا و سه‌رۆكی كاروباری ده‌ره‌وه‌ له‌ سێناتی فه‌ڕه‌نسا له‌گه‌ڵی دان له‌ درێژه‌ی قسه‌كانیدا باسی له‌وه‌كرد كه‌ چاوی به‌ ئێزدییه‌كانیش كه‌وتووه‌ و روونیكرده‌وه‌ "دوێنێ شه‌و چاومان به‌ رێكخراوه‌ ئێزدییه‌كان كه‌وت، ئێزدییه‌كان رووبه‌ڕووی ناخۆشیی زۆر بوونه‌وه‌، خاتوو نادیه‌ موراد زۆر وێنه‌ی بڵاوكرده‌وه‌ و زۆر دیمه‌نی نیشانی جیهان دا، به‌ڵام به‌داخه‌وه‌ هێشتا گه‌ڕانه‌وه‌ بۆ شنگال جێی مه‌ترسییه‌، پێشم باشه‌ دۆسیه‌ی شنگال له‌سه‌ر ئاستی نێوده‌وڵه‌تی به‌رچاو بگیرێت، چونكه‌ به‌ڕاستی خه‌ڵكی شنگال زۆر نه‌هامه‌تییان بینی و مافی ئه‌وه‌یان هه‌یه‌ جارێكی دیكه‌ بگه‌ڕێنه‌وه‌ زێدی خۆیان".