مەسرور بارزانی و محەمەد جەواد زەریف کۆبوونەوە

هەولێر - AA

ئەمڕۆ سێشەممە راوێژکاری ئەنجوومەنی ئاسایشی ھەرێمی کوردستان، مەسرور بارزانی پێشوازی لە وەزیری دەرەوەی ئێران، محەمەد جەواد زەریف و شاندێکی یاوەری کرد.

بەپێی هەواڵێکی نووسینگەی راوێژکاری ئەنجوومەنی ئاسایشی هەرێمی کوردستان کە کۆپییەکی بۆ ئاژانسی ئانادۆڵو نێردراوە لە دیدارێکدا دوا پەرەسەندن و رەوشی ناوچەکە و پەرەپێدانی پەیوەندییەکانی نێوان ھەرێمی کوردستان و کۆماری ئیسلامی ئێران گفتوگۆی لەسەر کراوە.

مەسرور بارزانی وێڕای بەخێرھێنانی وەزیری دەرەوەی ئێران، تیشکی خستووەتە سەر پەیوەندی لە مێژینەی نێوان ھەردوو گەلی کوردستان و گەلانی کۆماری ئیسلامی ئێران و ئاماژەی بە دراوسێیەتی باش و بەرژەوەندییە ھاوبەشەکان داوە لە سەر بنەمای رێز و ھاوسەنگی دوولایەنە.

ئاماژە بەوەشکراوە کە لە دیدارەکەدا ھەڕەشەکانی تیرۆریستان و پەرەسەندنی پەیوەندییەکانی نێوان بەغدا و ھەولێر و پرسە ھاوبەشەکان و پێشھاتەکانی ناوچەکە تاوتوێکراوە.

وەزیری دەرەوەی ئێران ھیوای سەرکەوتنی بۆ مەسرور بارزانی خواستووە لە سەرۆکایەتیکردنی کابینەی نوێی حکوومەتی ھەرێمی کوردستان و باسی لە بایەخی پەرەپێدان بە میکانیزمی پەیوەندییەکان، بەتایبەتی لە بواری پەیوەندییە ئابورییەکان لە چوارچێوەی پەیوەندییە ئابووریەکانی ئێران و عێراق کردووە و رایگەیاندووە کە سەقامگیری و ئاسایشی ھەرێمی کوردستان و عێراق بۆ ئێران گرنگە و لەو پێناوەدا ئامادەی پەرەپێدانی ھەموو ھاوکارییەکانن.