Fatma Esma Arslan
27 تەمووز 2023•نوێکردنەوە: 27 تەمووز 2023
داکار - AA
لە نیجەر ژمارەیەک سەرباز دەستیان بەسەر دەسەڵاتدا گرت.
گرووپێک لە سەربازان کە ناوی "ئەنجوومەنی نیشتمانیی پاراستنی نیشتمان (CNSP)"یان لەخۆناوە لە گرتەیەکی ڤیدیۆییدا کە لە بارەگایەکدا تۆماریان کردبوو و لە رادیۆ و تەلەڤیزیۆنی فەرمی نیجەر (ORTN) پەخشیان کرد، بەیاننامەی کودەتایان خوێندەوە.
لە بەیاننامەکەدا کە لەلایەن موقەدەم ئامادۆو عەبدرامانێ خوێندرایەوە، باس لەوە کرا بەهۆی خراپبوونی دۆخی ئەمنی و ئەو قەیرانە سۆسیۆلۆجی-ئابوورییهی وڵات پێیدا تێدەپەڕی، دەسەڵاتی (سەرکۆماری وڵات) محەمەد بازوم رووخێندرا و دەستوور هەڵپەسێردرا.
لە بەیاننامەکەدا ئاماژە بەوە کراوە کە لەنێوان کاتژمێر ٢٢:٠٠ بۆ ٠٥:٠٠ (بە کاتی ناوخۆ) قەدەغەی هاتوچۆ جێبەجێ دەکرێت و سەرجەم سنوورەکان دادەخرێن.
بەرەبەیانی ئەمڕۆ سەرکۆماری نیجەر، محەمەد بازوم دەستبەسەر کرا.
خەڵک بۆ رێگەگرتن لە کودەتاکە رژانە سەر شەقامەکان و داوای ئازادکردنی بازوم-یان کرد.
باس لەوە کرا کە جەنەراڵ عومەر چیانی کە نزیکەی ١٠ ساڵە فەرماندەی پاسەوانانی سەرۆکایەتیی کۆمارە لە پشت کودەتاکەوەیە.
بانگەشەی ئەوە دەکرێت بازوم لەم دواییانەدا ویستویەتی عومەر چیانی لە کارەکەی دووربخاتەوە.
لە نیجەر کە لە ساڵی ١٩٦٠ەوە سەربەخۆیی بەدەستهێناوە، تا ئێستا چوار جار کودەتا ئەنجام دراوە. دوایین کودەتاکە لە وڵاتدا لە ساڵی ٢٠١٠ لە دژی سەرکۆماری پێشووی وڵاتەکە، مامەدۆو تەنجا ئەنجام درا.
محەمەد بازوم کە لە مانگی شوباتی ساڵی ٢٠٢١ هەڵبژێردرا لە ٣١ی ئاداری هەمان ساڵدا، بەر لەوەی سوێندی یاسایی بخوات، هەوڵێکی کودەتای بەرامبەر ئەنجام درا کە لە ماوەیەکی کورتدا هەوڵەکە سەرکوت کرا.
