مایک پۆمپیۆ دەست بە گەشتەکەی بۆ رۆژھەڵاتی ناوەڕاست دەکات

واشنتۆن ــ AA

ئەمڕۆ سێشەممە، وەزیری دەرەوەی ئەمریکا، مایک پۆمپیۆ دەست بە گەشتەکەی دەکات بۆ رۆژھەڵات ناوەڕاست کە ھەریەک لە کوێت، ئیسرائیل و لوبنان دەگرێتەوە.

بەپێی راگەیەندراوێک کە لە لایەن وەزارەتی دەرەوەی ئەمریکا بڵاوکراوەتەوە، گەشتەکەی مایک پۆمپیۆ بۆ رۆژھەڵاتی ناوەڕاست لە ١٩ تا ٢٣ی ئەم مانگە بەردەوام دەبێت کە لە کوێت-ەوە دەست پێ دەکات.

لە راگەیەندراوەکەدا ئاماژە بە خشتەی کاری گەشتەکە کراوە و ھاتووە "مایک پۆمپیۆ لە چوارچێوەی گەشتەکەیدا، ژمارەیەک پرسی گرنگ لەگەڵ بەرپرسانی ئەو سێ وڵاتە تاوتوێ دەکات لەوانە؛ پەیوەندییە دووقۆڵییەکان، کاری ھاوبەش، ھاوکاری ئابووری و رووبەڕووبوونەوەی چالاکییەکانی ئێران لە ناوچەکە".

ھەر بەپێی راگەیەندراوەکە، وەزیری دەرەوەی ئەمریکا لە میانی سەردانەکەی بۆ ئیسرائیل چاوی بە بەرپرسانی یۆنان و قوبرس دەکەوێت.

وەزارەتی دەرەوەی ئەمریکا وای لەقەڵەمداوە کە ھەریەک لە کوێت، ئیسرائیل و لوبنان وڵاتی گرنگن بۆ ئاسایش و سەقامگیری ناوچەی رۆژهەڵاتی ناوەڕاست، ھەروەھا رۆڵی گرنگ و بەرچاویش دەگێرن لە گەشەپێدانی ئابووری ناوچەکە.

لە راگەیەندراوەکەدا جەخت لەوەکراوەتەوە کە ئەمریکا سوورە لەسەر پتەوترکردنی پەیوەندییەکانی لەگەڵ ئەو وڵاتانەدا.