مەراسیمی ماڵئاوایکردن لە حافزە بچووکەی فەڵەستین

غەززە - AA

تەرمی حەوت ھاووڵاتی فەڵەستینی کە بەھۆی تەقەی سوپای ئیسرائیل لە چوارچێوەی خۆپیشاندانەکانی ئاشتی لە ژێر ناوی "رێپێوانی گەڕانەوەی گەورە" لە کەرتی غەززە کوژرابوون، ئەمڕۆ بە خاک سپێردران.

دوێنێ محەمەد وەلید مستەفا ھەنییە (٣٢)، محەمەد شەخسا (٢٤)، ئیاد خەلیل ئەلشایر (١٨) لە کەرتی غەززە و نەسر موسبیحی تەمەن ١٢ ساڵ و محەمەد ئینشات لە شاری خان یونس لەلایەن سوپای ئیسرائیل شەھید کرابوون. بە ھەمان شێوە محەمەد ئەلحەونی تەمەن ١٤ ساڵ و ئەشرەف ئەلعەواودە لە کەمپی پەنابەرانی ئەلبورەیج لەلایەن سەربازانی ئیسرائیل شەھیدکران و ئەمڕۆش تەرمەکانیان بە خاک سپێردران.

تەرمی موسبیح-ی تەمەن ١٢ ساڵ کە لەھەمان کاتدا حافزی قورئان بوو، ئەمڕۆ لە شاری خان یونس گوڵباران کرا و بە شەقامەکانی ئەو شارە سوڕێنرایەوە. پاشانیش مەراسیمی ماڵئاوایکردنی ئەو شەھیدە بە ئامادەبوونی زۆربەی ھاوڕێکانی قوتابخانەی دەستیپێکرد.

یەکێک لە ھاوڕێ نزیکەکانی ئەو شەھیدە بە ناوی تۆفیق ئەبو عەنزە بە ئاژانسی ئانادۆڵوی راگەیاند کە وێنەی موسبیح لە دیواری قوتابخانەکەیان ھەڵدواسن. گوتیشی: "لە کوێیە مافی مرۆڤ؟ بۆچی منداڵان دەکوژن؟ ئێمە تاکو ئێستا منداڵین و سەربازانی ئیسرائیلیش دەمانکوژن. نازانم چی بڵێم. بانگھێشتی کۆمەڵگەی نێودەوڵەتی دەکەم کە خراپەکارییەکانی ئیسرائیل بەرامبەر ئێمە رابگرێ".