نێجیریا.. رزگارکردنی٣٢ ژن و منداڵ لە چنگی بۆکۆ حەرام

ئەبوجا - AA

لە باکووری رۆژهەڵاتی نێجیریا، ٣٢ ژن و منداڵ کە رێکخراوی تیرۆریستیی بۆکۆ حەرام بە بارمتە گرتبوونی، رزگارکران.

جێگری گوتەبێژی وەزارەتی بەرگریی نێجیریا، بێرنارد ئۆنیەوکۆ لەو بارەیەوە راگەیەندراوێکی بڵاوکردەوە و تیایدا ئەوەی خستووەتەڕوو کە سوپای نێجیریا لە ناوچەکانی باما و دامبۆوا سەربە ویلایەتی بۆرنۆ ئۆپەراسیۆنی بۆسەر رێکخراوی تیرۆریستیی بۆکۆ حەرام ئەنجامداوە.

ئەوەشی ئاشکرا کردووە کە لە ئۆپەراسیۆنەکانی ئەو ویلایەتەدا، ١٠ ژن و ٢٢ منداڵ لە چنگی رێکخراوەکە رزگارکراون و ٢٨ تیرۆریستیش دەستگیرکراون.

هیچ زانیارییەک لەبارەی ئەوە نەخراوەتە روو کە بارمتەکان کەی رفێندراون.

رێکخراوی تیرۆریستیی بۆکۆ حەرام لە ساڵی ٢٠٠٠ لە نێجیریا سەری هەڵداوە و بەهۆی پەلامارەکانی رێکخراوەکەوە لە ساڵی ٢٠٠٩وە تا ئێستا زیاتر لە ٢٠ هەزار کەس گیانیان لەدەستداوە.

لە ساڵی ٢٠١٥وە بۆکۆ حەرام چالاکییەکانی بردووەتە وڵاتانی دراوسێی نێجیریا وەک کامیرون، چاد و نیجەر دیارترین پەلاماریش، هێرشکردنە سەر دەورووبەری دەریاچەی چاد بوو کە تیایدا زیاتر لە دوو هەزار کەس کوژران.

تا ئێستاش بەهۆی شەڕ و پێکدادانەکانەوە لە نێجیریا سەدان هەزار کەس ناچار بە بەجێهێشتنی ماڵ و حاڵیان بوون.