وەزیری بەرگریی ئیسرائیل کاتز پلانی داگیرکردنی شاری غەززەی پەسەند کرد

قودس - AA

وەزیری بەرگریی ئیسرائیل، یسرائیل کاتز ئاماژەی بەوە کرد پلانی داگیرکردنی شاری غەززەی پەسەند کردووە کە سەرۆک ئەرکانی سوپا، ئەیال زەمیر پێشکەشی کردبوو.

بەپێی هەواڵێکی ڕۆژنامەی زە تایمز ئۆف ئیسرائیل، کاتز دوای ئەوەی شەوی ڕابردوو لەگەڵ سەرۆک ئەرکانی سوپا زەمیر و فەرماندەکانی سوپادا سەبارەت بە داگیرکردنی شاری غەززە کۆبووەتەوە، ئەم بەیانییە پلانی سوپای بۆ داگیرکردنی شاری غەززەى پەسەند کردووە.

وەک بەشێک لە پلانی داگیرکردنی شارەکە، وەزیری بەرگریی ئیسرائیل کاتز، ئامادەکارییەکانی بۆ ڕاگواستنی نزیکەی یەک ملیۆن هاووڵاتی فەڵەستینی بۆ باشووری ناوچەکە پەسەند کردووە.

ئاماژە بەوەیش کرا کە ناوی هێرشەکانی داگیرکردنی شاری غەززە ناونراوە "گالیسکەکانی شەڕی گیدئۆن II".