مەحما خەلیل: "بوونی پەکەکە لە شنگال هەڵبژاردنەکان دەشێوێنێت"

بەغدا - AA

قایمقامی شنگال، مەحما خەلیل رایگەیاند، بوونی چەکدارانی رێکخراوی تیرۆریستی پەکەکە کاریگەری نەرێنی دەکاتە سەر هەڵبژاردنی پێشوەختەی ئەنجوومەنی نوێنەرانی عێراق کە بڕیارە شەشی حوزەیرانی ئەمساڵ بەڕێوەبچێت و هۆشدارییشیدا لەوەی مانەوەی چەکدارانی رێکخراوەکە وا لە دەنگدەران دەکات بەشداریی لە پرۆسەکەدا نەکەن.

مەحما خەلیل لە لێدوانێکدا بۆ ئاژانسی ئانادۆڵو گوتی: "چەکدارانی پەکەکە لە شنگال نەکشاونەتەوە، ئەوەی روویداوە تەنها کشانەوەیەکی بە رواڵەت بووە، تەنها جلوبەرگەکانیان گۆڕیوە و بارەگاکانیان لەناو شنگالدا ماون".

روونیشیکردەوە کە بوونی چەکداری نایاسایی لەناو قەزای شنگال پرۆسەی هەڵبژاردنەکان دەشێوێنێت و ئاماژەی بەوەشدا مانەوەی چەکدارانی رێکخراوەکە وا لە دەنگدەران دەکات بەشداریی لە پرۆسەکەدا نەکەن.

رۆژی نۆی تشرینی یەکەمی ساڵی رابردوو، ھەولێر و بەغدا لەسەر دروستکردنی ئیدارەیەکی نوێ بۆ شنگال رێککەوتن.

بەپێی رێککەوتنەکە، ئیدارەیەکی ھاوبەش لەنێوان حکوومەتی فیدراڵ و حکوومەتی ھەرێم لە شنگال دروست دەکرێت و دۆسیەی ئەمنی شارەکە بە پۆلیسی خۆجێی و پاراستنی دەرەوەی شارەکەش بە سوپای عێراق و پێشمەرگە دەسپێردرێت.

دوای گشتپرسی ھەرێمی کوردستان لە ساڵی ٢٠١٧دا، و لووتکەی ناکۆکییەکانی نێوان ھەولێر و بەغدا، شنگال لەپاڵ کۆمەڵێک ناوچەی جێناکۆکی نێوان ھەرێم و بەغدا، کەوتە ژێر دەستی چەکدارانی نایاسایی و ھێزەکانی حەشدی شەعبی.

دانیشتووانی شنگال، کە دوای ساڵی ٢٠١٤ بە ھۆی ھێرشی داعشەوە ناوچەکەیان چۆڵکردبوو، و ئاوارە بوون، داوا دەکەن ھێزە چەکدارەکان شارەکەیان چۆڵبکەن و دۆخی مەدەنی و ئاسایی بۆ ناوچەکەیان بگەڕێتەوە.