وه‌زیری ئه‌وقاف و كاروباری ئایینی چاوی به‌ پاپا و سه‌رۆكوه‌یرانی ڤاتیكان ده‌كه‌وێت

هه‌ولێر - AA
شاندێكی وه‌زاره‌تی ئه‌وقاف و كاره‌باری ئایینی حكوومه‌تی هه‌رێمی كوردستان سه‌ردانی ڤاتیكان ده‌كات.
ئه‌مڕۆ چوارشەممە شاندێكی وه‌زاره‌تی ئەوقاف و كاروباری ئایینی حكوومه‌تی هه‌رێمی كوردستان له‌ كۆبونه‌وه‌یه‌كدا به‌سه‌رۆكایه‌تی وه‌زیری ئه‌وقاف و كاروباری ئایینی، پشتیوان سادق له‌گه‌ڵ سه‌رۆكوه‌زیرانی ڤاتیكان، پێترۆ پارۆلین كۆبوونه‌وه‌.
له‌ كۆبونه‌وه‌كه‌دا باس له‌ په‌یوه‌ندی هه‌ردوولا و‌ رۆڵی هه‌رێمی كوردستان بۆ له‌ خۆگرتنی ئاواره‌كان به‌گشتی و پێكه‌وه‌ژیانی ئایینی به‌رز نرخێنرا.
ماڵپه‌ڕی وه‌زاره‌تی ئه‌وقاف و كاروباری ئایینی حكوومه‌تی هه‌رێمی كوردستان بڵاویکردەوە، سه‌رۆكوه‌زیرانی ڤاتیكان سوپاسی حكوومه‌تی هه‌رێمی كوردستان و گه‌لی كوردستانی كرد كه‌ نموونه‌یه‌كی جوانی به‌ها به‌رزه‌كانی مرۆڤایه‌تی پیشانی هه‌موو دونیا ده‌ده‌ن، هه‌روه‌ها سوپاسی ئه‌و پێشوازییه‌ گه‌رمه‌ی كرد كه‌ له‌كاتی سه‌ردانی بۆ هه‌رێمی كوردستان لێكراوه‌.
هه‌روه‌ها له‌ بۆنه‌یه‌كی گشتیدا له‌ ڤاتیكان، پشتیوان سادق و ‌شاندی یاوه‌ری چاویان به‌ پاپاپی ڤاتیكان كه‌وت و به‌ڕێزیان دڵخۆشی خۆی بۆ ئارامی كوردستان و به‌ها مرۆڤایه‌تییه‌كانی خه‌ڵكی كوردستان ده‌ربڕی و به‌ڵێنی دا كه‌ هه‌وڵ ده‌دات سه‌ردانی عێراق و هه‌رێمی كوردستان بكات .
هەر لە میانی دیدارەکانییدا، بڕیاره‌ وه‌زیری ئه‌وقاف له‌گه‌ڵ وه‌زیری ده‌ره‌وه‌ی ڤاتیكان و جێگری وه‌زیری ده‌ره‌وه‌ی ئیتاڵیا كۆببێته‌وه‌.
له‌م كۆبوونه‌وانه‌دا باس له‌ رۆڵی مامۆستایانی ئایینی پیرۆز ئیسلامی و له‌ بڵاوبوونه‌وه‌ی بیری میانڕه‌وی له‌ هه‌رێمی كوردستان ده‌كرێت.