کاروان ئەنوەر: "هەندێک لە مێدیاکان نهێنى سەربازیى دەدرکێنن"

کاروان ئەنوەر ماوەى چەند ساڵێکە سکرتێرى لقى سلێمانى سەندیکاى رۆژنامەنووسانى کوردستانە و هەروەها سەرنووسەرى سایتى pukmedia ى زمانحاڵى یەکێتى نیشتیمانى کوردستانە.

سکرتێرى لقى سلێمانى سەندیکاى رۆژنامەنوسانى کوردستان، کاروان ئەنوەر بە ئاژانسى ئانادۆڵوى راگەیاند "دواى تێپەڕبوونى نزیکەی سێ ساڵ بەسەر شەرى داعش و هێرشی ئەو چەکدارانە بۆ بەشێک لە خالی عێراق و هەرێمى کوردستان ،بەڵام مێدیایى کوردى لە ئێستادا دەیەوێت کار بکات بۆئەوەى بتوانێت بەشێوەیەکى راست و دروست روماڵى شەڕ و رووداوەکانى جەنگی دژى داعش بکات".

ئەو گوتیشى: "کەناڵەکانى راگەیاندن بە مێدیایى بینراو بیسترا و خوێندراوە وە لە ساڵى 2014 بەشێوەیەکى خراپ رووماڵى شەڕەکانى داعشیان دەکرد بەوەى هیچ نهێنیەکى سەربازیى نەما لە راستەخۆى کەنالەکان باسى نەکرێت سەرجەم زانیارییەکانیان ئاشکراکرد، ئێمەش لە ساڵى 2014 داوامان کرد کە بۆردێک بۆ رۆژنامەنوسان دروست بکرێت کە چۆن رووماڵى شەرەکان بکرێت بۆیە هەر ئەو ساڵە بۆردێکمان دروست کرد بەناوى بۆردى چاودێرى و راوێژکارى بە ئامادەبوونى داوکارى گشتى و نوێنەرى وەزارەتى پێشمەرگە و نوێنەرى وەزارەتى ناوخۆى، هەروەها چەند رۆژنامەنوسێکى بەتوانا و بە ئەزموون بەڵام بەداخەوە لەکاتى خۆیدا کەناڵەکان پابەندى بریارەکان و پرەنسیپەکانى نەبوون".

کاروان گوتیشی: "بۆیە لە ساڵى 2016 دا داواکارى گشتى فەرمانێکی تایبەت بۆ چەند دەزگایەکی راگەیاندن دەرکرد و تێیدا بریاریدا کە ناکرێت ئەم مێدیایانە بەخشى راستەوخۆ لە بەرەکانى جەنگ بکەن و ئەم بریارە بۆ سەرجەم کەناڵەکانى کوردستانە کە نابێت رووماڵى راستەوخۆ لە بەرەکانی شەڕ بکەن".

سکرتێرى لقى سلێمانى سەندیکاى رۆژنامەونوسانى کوردستان راشیگەیاند: "بۆ ئەوەى روماڵێکى راست و دروست بکرێت و هیچ دراکاندنێکى زانیاریى سەربازیی تێدا نەبێت، خولێکى دوو رۆژە بۆ رۆژنامەنووسانى سەرجەم لقەکانمان لە شار و شارۆچکەکان کردەوە بۆ ئەوەى ئاشنا بکرێن بە چۆنیەتی روماڵکردن و چۆنیەتی خۆپاراستنی گیانی رۆژنامەنوس لە شەهید بوون بریندار بوون یاخود چۆن بتوانێت خۆى چارەسەری سەرەتایی بۆخۆی بکات لە کاتى بریندار بوونى، ئێمە لەماوەى ئەو دوو رۆژەدا هەر ئەوەندەمان توانى کە ئەو خولە بکەینەوە و رۆژنامەنووسان لەو بابەتانە ئاگادار بکەینەوە، بەڵام لە دواى ئەوەى لە ئێستادا هێشتا هەندێک مێدیا هەیە کە نهێنیى سەربازىی دەدرکێنن".

ئەو دەشلێت: "ئێمە وەک رۆژنامەنووسان هیچ رۆژنامەنووسێکى بەرەى جەنگمان نییە کە ئەمەش کەلێنێکى گەورەیە بۆیە لەگەڵ دەست پێکردنى شەردا هەستمان بەوە کرد کە رۆژنامەنووسى جەنگمان پێویستە، بەڵام کەسمان دروست نەکردووە کە ناوى پەیامنێرى جەنگ بێت، من ئەم کەمتەرخەمیە بۆ هەریەکە لە وەزارەتى پێشمەرگە و سەندیکاى رۆژنامەنووسان دەگێرمەوە کە دەبووایە کارییان بکردبایە بۆئەوەى رۆژنامەنووسى جەنگ دروست بکەن بۆیە لە شەڕەکائی لە ماوەى ئەم چەند ساڵەدا چەندین رۆژنامەنووس و وێنەگر شەهید بوون".

لەبارەى ژمارەی شەهید و برینداربوونی رۆژنامەنووسان لە بەرەکانى جەنگ کاروان ئەنوەر گوتى: "بەشێوەیەکى گشتى و لە ساڵى 1992 بەدواوە بە شەرەکانى ناوخۆ و شەرى داعشییشەوە، رۆژنامەنووسانى هەرێمى کوردستان لە بەغدا و مووسڵ چەندین شەهید و بریندارمان هەیەوە، بەوەى تەنها لە شەڕی مووسڵ 7 رۆژنامەنووسى شەهیدمان هەیە و چەندینی دیکەش برینداربوون و لە بەغدای پایتەختى عێراق چەندین رۆژنامەنوسى هەرێمى کوردستان شەهید و برینداربوون وە رۆژنامەنوسێکى دیلیش هەیە کە تاکو ئێستا ئازاد نەکراوە لەلاى داعشە کەئەوەش بەهۆى ئەوەبووە کە نەمان توانیووە رۆژنامەنووسى جەنگ دروست بکەین".

لە رێکەوتی 24-10-2016 و بەفەرمانێکی سەرۆکایەتى داوکارى گشتى چەند مێدیایەکى کوردستان بەخشى راستەخۆى بەرەکانى جەنگیان لێ قەدەغە کرا، هەر بۆیە سکرتێرى لقى سلێمانى سەندیکاى رۆژنامەنووسانى کوردستان داوادەکات مێدیاکان کاربکەن بۆئەوەى بتوانن هیچ زانیارییەک نەدەنە دوژمنان و لەسەر پرەنسیبى رۆژنامەوانى کاربکەن.