حەشدی شەعبی تاوەرەکانی کارەبای کەرکووک-بێجی باکووری عێراق دەپارێزێت

ھەولێر ــ AA

دەستەی حەشدی شەعبی رایگەیاند کە ھێزەکانی بە ئامانجی پاراستنی تاوەرەکانی گواستنەوەی کارەبا لەنێوان سنووری کارگێڕیی پارێزگای کەرکووک و قەزای بێجی سەربە پارێزگای سەڵاحەددین (کەرکووک-بێجی) بڵاوکراونەتەوە.

دەستەی حەشدی شەعبی لە راگەیەندراوێکدا ئاماژەی بەوە داوە کە ھێزەکانی لیوای ٨٨ی حەشدی شەعبی بەدرێژایی تاوەرەکانی گواستنەوەی کارەبا لەنێوان سنووری کارگێڕیی پارێزگای کەرکووک و قەزای بێجی بڵاوکراونەتەوە.

باسی لەوەش کردووە کە ھێزەکانی حەشدی شەعبی بە درێژایی ھێڵەکە هەڵمەتی گەڕان و پشکنیان ئەنجامداوە، بەتایبەتیش دوای کۆتایی ھاتنی شەپۆلی خۆڵبارین کە بەردەوام تیرۆریستان خراپبوونی رەوشی کەشوھەوا بۆ ئەنجامدانی پەلاماری تیرۆریستی دەقۆزنەوە.

ئاماژەی بەوەیش داوە کە پێشتر بۆ چەندین جار، ھێڵی گواستنەوەی کارەبا کەرکووک-بێجی، بە کردەی تێکدەرانە و تەقاندنەوەی بۆمبی چێنراوەوە کراوەتە ئامانج.

لە میانی ساڵی رابردوودا، ژمارەیەک ھێڵی گواستنەوەی کارەبا لە سنووری پارێزگاکانی بەغدا، نەینەوا، کەرکووک، سەڵاحەددین و دیالە بە کردەی تێکدەرانە و تیرۆریستی کرانە ئامانج کە بەھۆیەوە ژمارەیەک تاوەری گواستنەوەی کارەبا لەو ناوچانە تەقێندراونەوە.