سیستانی ھۆشداری دەدات لە بارەی خۆپیشاندانەکانی عێراق

عێراق ـ AA

مەرجەعی باڵای شیعەکان لە عێراق، عەلی سیستانی ئەمڕۆ ھەینی ھۆشداریدا لەوەی عێراق بەرەو توندوتیژی و ئاژاوەگێڕی ببرێت لە میانی خۆپیشاندانەکان کە لە بەغدا و چەند شارێکی تری باشووری وڵاتەکە دەستی پێکردووەتەوە.

سیستانی لە بەیاننامەیەکدا کە لە گوتاری ھەینی ئەمڕۆی شاری کەربەلا لەلایەن نوێنەرەکەی، عەبدولمەھدی کەربەلائی خوێندرایەوە، پەیامی خۆی لە بارەی خۆپیشاندانەکانەوە ئاراستەی ھەمووان کرد.

تیایدا سیستانی داوای لە خۆپیشاندەران و ھێزە ئەمنییەکان کردووە پابەندی تەواوی خۆپیشاندانی ئاشتیانە بن و رێگەنەدان بەئاراستەکردنی خۆپیشاندانەکان بەرەو توندوتیژی و کردەوەی ئاژاوەگێڕی و تێکدەرانە.

مەرجەعی باڵای شیعەکان لە عێراق ھەروەھا داوای لێکۆڵینەوەیەکی دادوەری بێلایەنانەی کرد لەو توندوتیژییانەی لە خۆپیشاندانەکانی رابردوو لەسەرەتای ئەم مانگەدا کەوتنەوە.

سیستانی لەو بارەیەوە گوتی: "لە ئەنجامی لێکۆڵینەوەکانی حکوومەت ھەموو راستییەکان ئاشکرا نەکراون".

سیستانی ھۆشداری ئەوەشی داوە کە عێراق بکرێتە گۆڕەپانی یەکلاکردنەوەی حساباتی ھەرێمی و نێودەوڵەتی.