چارەنووسی ٧ هاووڵاتی قەرەتەپە نادیارە

هەولێر - AA

جموجۆڵی گرووپە تیرۆریستییەکانی داعش لە سنوورەکانی نێوان هێزە عێراقییەکان و هێزی پێشمەرگە زیادیکردووە و رۆژی هەینی رابردووش، چەکدارانی داعش بازگەیەکیان لە نزیک قەرەتەپە داناوە و هەشت هاووڵاتییان دەستگیرکردووە کە یەکێکیان لەگەڵ منداڵەکانی دەبێت و هەر ئەوکات لە پێش چاوی منداڵەکان گوللـەبارانی دەکەن.

بەرپرسێکی بەرەی تورکمانی ئاماژە بەوە دەکات کە هاووڵاتییەکە تورکمانە، کەسێکی سڤیل بووە و لە کاتی گەڕانەوەی بۆ ماڵەوە تووشی بازگەیەک دەبێت کە تیرۆریستانی داعش دایانناوە و دەیهێننە خوارەوە و دواتر گوللـەبارانی دەکەن.

ئەندامی مەکتەبی سیاسیی بەرەی تورکمانی، ئایدن مەعروف لە لێدوانێکی بۆ ئاژانسی ئانادۆڵو گوتی: "دوو رۆژ لەمەوبەر لە ناوچەی قەرەپەتە و سەر بە پاریزگای دیالە، لە کاتێکدا کە هاووڵاتییان هاتوچۆ لە ناوچەکەدا دەکەن، بەداخەوە لەلایەن گرووپە تیرۆریستییەکانی داعش کە بازگەی ساختەیان داناوە و تیاییدا ٨ هاووڵاتییان دەستگیرکردووە، یەکێک لەو هاووڵاتییانە کە ناوی محەمەد سەمین و لە نەتەوەی تورکمانە، لە پێش چاوی منداڵەکانی گوللـەبارانییان کردووە، ئەوانی دیکەشیان بۆ شوێنێکی نادیار گواستووەتەوە کە ٥ هاووڵاتی تورکمان و ئەوانی دیکەش کورد و عەرەبن".

لەبارەی هۆکاری سەرهەڵدانەوەی گرووپە تیرۆریستییەکانی داعش لە ناوچەکەدا، ئایدن مەعروف گوتی: "دیارە بۆشایی ئەمنیی لەو ناوچەیەدا هەیە و سەرهەڵدانی گرووپە تیرۆریستییەکانی داعش هۆکارەکەی بۆ نەبوونی هیزێکی تایبەتە لەناوچەکەدا، هەروەها داعش سوود لە ململانێی پێکهاتەکان وەردەگرێت و بۆ بەرژەوەندی خۆی بەکاریان دەهێنێت کە تیایدا هاووڵاتیی مەدەنی دەکرێتە قوربانی و لەماوەی رابردووشدا ئەو کارانەی کردووە".

ئەو بەرپرسەی بەرەی تورکمانی پێیوایە کە دەبێت هەردوو حکوومەتی عێراق و هەرێمی کوردستانیش کاری جدی بکەن بۆ رووبەڕووبوونەوەی تیرۆریستان و گوتی: "دەبێت حکوومەتی عێراق و حکوومەتی هەرێمی کوردستانیش کاری جدی بکەن لەسەر ئەم بابەتە بۆ ئەوەی هاووڵاتییانی مەدەنی نەبنە قوربانی، چونکە ئەمە پەیوەندی بە گیانی هاووڵاتییانەوە هەیە و فشارێکی زۆری لەسەر دانیشتووان دروستکردووە کە وا دەکات دانیشتووان شوێنی نیشتەجێبوونی خۆیان بەجێبهێڵن کە ئەمەش پێشێلکاریی مافەکانی مرۆڤە".

لەبارەی هەوڵەکانی بەرەی تورکمانی بۆ هەماهەنگی لەگەڵ حکوومەتی ناوەند بە مەبەستی پاراستنی گیانی هاووڵاتییانی سڤیل لە ناوچەکەدا، ئایدن مەعروف گوتی :"وەکو پێکهاتە و بەرەی تورکمانی هەماهەنگیمان لەگەڵ حکوومەتی خۆجێی ناوچەکە هەیە، بەڵام داعش سوود لە ململانێی نێوان هێزەکان وەردەگرێت، دەبێت حکوومەتی عێراق و هەرێمی کوردستانیش هەماهەنگیان هەبێت بۆ ئەوەی کۆتایی بە گرووپە تیرۆریستییەکان بهێنن".

ناوبراو جەخت لەوە دەکاتەوە کە داعش ئایدۆلۆژیایە و بنەبڕکردنیشی وا ئاسان نیە و رووبەڕوونەبوونەوەی ئەم گرووپە بە مەترسی دەزانێت لە ناوچەکە و گوتی: "داعش ئایدۆلۆژیایە بۆیە بنەبڕکردنی تۆزێک زەحمەتە و بوونی هەیە لەناوچەکەدا، لە شارەکان وەکو هێز نەماون بەڵام لەرووی ئایدۆلۆژیاوە هەیە، بە شێوەیەکی رۆژانە لە ناوچەکانی خانەقین و قەرەتەپە و ناوچەکانی دیکە بوونیان هەیە و مەترسی لەسەر گیانی هاووڵاتییان هەیە".

ئایدن مەعروف گوتیشی: "ماوەی سێ رۆژە ئەو ٧ هاووڵاتییەیان بۆ شوێنێکی نادیار گواستووەتەوە و تا ئێستاش حکوومەتی عێراق هیچ هەنگاوێکی کردەیی نەناوە بۆ دۆزینەوەیان".