لە زەلکاوی ئەرهاجی دامێنی چیای ئاگری ٦٨ جۆری باڵندە دیاریی کران

ئیدر- AA

بۆ یەکەم جار لە میانی لێکۆڵینەوەیەکدا لە زەلکاوی ئەرهاجی دامێنی چیای ئاگری لە پارێزگای ئیدر، ٦٨ جۆری باڵندە دیاریی کران.

لە وەرزی پاییزدا ئەو باڵندە کۆچەرییانەی لە باکوورەوە بۆ باشوور کۆچ دەکەن لە پارێزگای ئیدر پشوو دەدەن و لە دوای حەسانەوە، دووبارە دەکەونەوەڕێ. بەگشتی ئەو باڵندانەی بەم رێگایەشدا دەڕۆن ئەو باڵندانەن کە بۆ باکووری ئەفریقا کۆچ دەکەن.

بەڕێوبەرایەتی پاراستنی سروشت و باخە گشتییەکانی پارێزگای ئیدر، زانکۆی ئیدر لەگەڵ باڵندەناسان و خۆبەخشان، چاودێری ئەو باڵندە کۆچەرییانەیان کرد کە لە گوندی ئەرهاجی دەمێننەوە.

لە لێکۆڵینەوەیەکدا و بۆ جاری یەکەم، ٦٨ جۆری باڵندەی ناوخۆیی و کۆچەری لە زەلکاوی ئەرهاجی تۆمار کرا.

- "لێکۆڵینەوە و چاودێرییەکان بەردەوامن"

بەڕێوبەری لێکۆڵینەوە لە زانستی باڵندەناسی لە زانکۆی ئیدر، د. ئەمرا چەلیک لە لێدوانێکیدا بۆ پەیامنێری ئاژانسی ئانادۆڵو، باسی لەوە کرد کە زۆر باڵندەی سەرنجڕاکێش لە زەلکاوەکەدا هەن و گوتیشی: "زەلکاوی ئەرهاجی یەکێکە لەو شوێنانەی خستوومانەتە ژێر چاودێریییەوە. لە ئەنجامی لێکۆڵینەوەکانماندا، ٦٨ جۆری باڵندەمان تۆمار کرد. بەردەوامیش دەبین لە چاودێریکردن و تۆمارکردنی هەر جۆرێکی نوێی باڵندەی کێوی".

د. ئەمرا چەلیک ئامژەی بەوەشدا کە رۆژبە رۆژ لێکۆڵینەوەکانیان قوڵتر دەبنەوە و گوتی: "ناوچەکە رێگای هاتوچۆی زۆر بەسەرەوە نییە. هەربۆیە باڵندەکان لێرە هەست بە ئاسایش و ئارامی دەکەن. لەئێستادا ئەم ناوچەیەمان خستووەتە ژێر چاودێریییەوە. بێگومان لێکۆڵینەوەکانمان لەم ناوچەیە چڕتر دەکەینەوە. بەتایبەت لەگەڵ هاتنی بەهار کارەکانمان لەم ناوچەیە زیاتر دەکەین".