Fatjon Cuka
24 Февруари 2026•Ажурирај: 25 Февруари 2026
ТИРАНА (AA) - Министерот за одбрана на Албанија, Пиро Венгу, изјави дека Албанија и Унгарија воспоставиле многу тесно партнерство, пренесува Анадолу.
Венгу престојуваше во официјална посета на Унгарија, каде што се сретна со унгарскиот колега Кристоф Салај-Бобровнички, при што одржаа и заедничка прес-конференција за медиумите.
- „Албанија и Унгарија изградија многу тесно партнерство на сите нивоа на владеење“
Во соопштението од Министерството за одбрана на Албанија се наведува дека во текот на билатералната средба во Будимпешта „се потврди тесното партнерство“ меѓу двете земји во областа на одбраната, безбедноста и европската интеграција.
Во своето обраќање министерот Венгу нагласи дека Албанија и Унгарија воспоставиле многу тесно партнерство на сите нивоа на владеење.
Венгу изјави дека во Албанија се влезени значајни инвестиции и компании од Унгарија, според него, овој елемент сега е столб на соработката што сакаат да ја развиваат и во воен аспект.
„Значаен дел од дискусиите ѝ беше посветен на соработката во областа на одбраната и воената индустрија. Министерот Венгу го оцени развојот на унгарската одбранбена индустрија и ја нагласи целта за поврзување на синџирите на воени снабдувања, со преференција за земјите сојузници. Во овој контекст, страните потпишаа два договора: еден за интензивирање на соработката во одбраната на цивилно ниво и друг меѓу институциите одговорни за иновации во одбраната, со цел да се добијат повеќе средства од европските програми“, се наведува во соопштението.
Исто така, се наведува дека министерот Венгу ја истакнал стратегиската важност на Југоисточна Европа за безбедноста на континентот, велејќи дека „Албанија не е периферија на Европа, туку дел од нејзиното нервно јадро“. Покрај тоа, Венгу потсети на заедничката ангажираност на Албанија и Унгарија во мисиите на КФОР во Косово и во мисијата на Европската Унија во Босна и Херцеговина.
- „Унгарија ја цени Албанија за нејзината улога во стабилноста на регионот“
Според соопштението, унгарскиот министер Кристоф Салај-Бобровнички искажа задоволство од развојот на билатералната средба во Будимпешта.
„Унгарскиот министер, исто така, даде посебна оценка за долгиот и стабилен пат што Албанија го следи кон европската интеграција, истакнувајќи дека Унгарија продолжува целосно да ја поддржува интеграцијата на Албанија во Европската Унија“, се наведува во соопштението.
Унгарскиот министер за одбрана изјави дека Западен Балкан има клучна историска, економска и социјална улога, додавајќи дека Унгарија ја цени Албанија за нејзината улога во стабилноста на регионот.
Министерствата за одбрана на Албанија и Унгарија потпишаа и два договора што „го зацврстуваат стратегиското партнерство во областа на одбраната и иновациите“.
