Во БиХ поплавени стотици објекти, во Хрватска врвот на водениот бран се очекува ноќва

САРАЕВО / ЗАГРЕБ (АА)

Обилните врнежи во последните денови доведоа до пораст на нивото на водата и поплави во Унско-санскиот кантон во Босна и Херцеговина. Најкритично е во Бихаќ, Босанска Крупа и Сански Мост, каде што е прогласена состојба на природна непогода и каде што се поплавени стотици објекти, пренесува Анадолу.

Извештаите за состојбата на водостојот покажуваат дека на подрачјето на Бихаќ и Босанска Крупа има тренд на опаѓање на нивото на водата за еден сантиметар, додека во Сански Мост има пад од два сантиметра.

Мајда Ковач, портпаролка на Федералната управа за цивилна заштита, за новинарот на Анадолу изјави дека фактот што е прогласена состојба на природна несреќа во два града и една општина потврдува дека ситуацијата е сериозна. Таа рече дека според информациите од вчера, на ова подрачје се поплавени над 200 објекти и дека денес таа бројка е сигурно поголема.

Најкритична е ситуацијата во Бихаќ, Босанска Крупа и Сански Мост.

Во Бихаќ реката Уна поплави неколку згради, а водата се излеа и на коловозите.

„Патните комуникации кон населбата Клиса (Бихаќ) се во прекин. Единицата за спасување на вода и под вода вчера им достави храна и вода за пиење на жителите од населеното место Клиса што беа отсечени“, рече Ковач.

Во Босанска Крупа, исто така, дошло до нагло покачување на водостојот на реката Уна, што довело до поплавување на голем број деловни, станбени и помошни објекти во населбите во овој град.

И во Бужим и Цазин имаше поплави, излевање на реките и потоците, како и активирање на одрони.

Ковач изјави дека денес ќе се одржи вонредна седница на Владата на Федерацијата Босна и Херцеговина.

- Состојбата во Хрватска

Во Хрватска борбата со поплавите поради надојдените реки Купа и Корана најинтензивно се води во карловачкото подрачје, Хрватска Костајница е поплавена поради излевањето на Уна и на северот на земјата реките се надојдени.

„Хрватски води“ најавуваат максимален водостој на реките Купа во Карловац во текот на ноќта, а реката Корана веќе се излеа од своето корито. Со водостој од 831 сантиметар, Купа и Корана, Карловац и деловите низводно од градот очекуваат нови проблеми бидејќи водостојот продолжува да расте.

На сила се вонредни мерки за одбрана од поплави и сите надлежни служби во Карловац се на терен, се градат насипи, се полнат дополнителни вреќи со песок и се дистрибуираат до загрозените делови на Карловац.

Во подрачјето на Карловац поплавени се викендички и дел од куќите, известија од „Хрватски води“, а штетата допрва ќе се проценува.

Во Хрватска Костајница, каде што е на сила вонредна состојба против поплави, водостојот на Уна во изминатото деноноќие пораснал за 52 сантиметра, утринава изнесуваше 490 сантиметри, а на градот му се закануваат и подземните води и Уна од БиХ.

Водостојот на Уна е во пораст и спротиводно од Хрватска Костајница, во Струга Банска и Добретин, како и низводно сè до устието на Сава во Јасеновац, каде што на сила се вонредни мерки за заштита од поплави.

Нивото на реката Бедња на подрачјето на Вараждин значително порасна, а реката Плитвица се излеа од коритото и ги поплави околните села на тоа подрачје.

Хрватската армија се вклучи во помошта на поплавените подрачја со 300 припадници во Сисачко-мославичката жупанија, а од синоќа 150 припадници на армијата во Карловачка жупанија со стручни служби работат на зајакнување на насипите, за врвот на водениот бран.