Ербас A350 првпат ќе слета во Скопје со летовите на „Туркиш ерлајнс“

СКОПЈЕ (АА) - Еден од најголемите и најмодерните патнички авиони во светот, Ербас A350, првпат ќе слета во Скопје со летовите на „Туркиш ерлајнс“ на 19 и 27 јули, јавува Анадолу.

Овој настан ќе означи историски момент за македонското воздухопловство, првпат ќе слета и полета авион од типот Ербас A350 до и од Меѓународниот аеродром „Скопје“.

Ова е дел од редовната линија на „Туркиш ерлајнс“ на релација Скопје-Истанбул на 19 јули и Истанбул-Скопје на 27 јули.

Иако линијата е редовна, токму на овие датуми патниците ќе имаат ексклузивна можност да патуваат со авион од оваа класа што ретко се користи на кратки релации од ваков вид.

Ербас A350 е симбол на најновата генерација во комерцијалната авијација, со високо ниво на комфор, тивко летање, напредни технологии и поголем простор за патниците.

Во авионот може да се сместат повеќе од 300 патници, дизајниран е за долги релации, а на љубителите на авијацијата и на сите што сакаат да летаат им нуди поинакво искуство во воздух.

Покрај уникатното искуство на летање со A350, патниците ќе може да уживаат и во еднонеделен престој во Истанбул, град што нуди богата историја, култура, шопинг и гастрономија.

За повеќе информации во врска со летот може да контактирате со „Туркиш ерлајнс“.