Коста по Самитот ЕУ-Западен Балкан: Нема сомнеж дека иднината на Западен Балкан е во Европската Унија

Нема сомнеж дека иднината на земјите од Западен Балкан е во Европската Унија, порача претседателот на Европскиот совет, Антонио Коста, по Самитот ЕУ - Западен Балкан во Брисел, јавува Анадолу.

Тој истакна дека ЕУ испраќа силен сигнал преку Декларацијата усвоена на Самитот со која се согласуваат и лидерите од Западен Балкан.

„За време на денешниот самит беше јасно дека Европската Унија и Западен Балкан припаѓаат на исто европско семејство. Западен Балкан има место во срцето на нашиот европски проект“, рече Коста.

Тој посочи дека на проширувањето на европското семејство е заедничка движечка сила.

„Факт е дека секоја земја што ќе влезе во Европската Унија е многу попросперитетна благодарение на нејзиното членство. Ова е европското ветување за просперитет“, рече Коста.

Тој нагласи дека проширувањето е и најдобрата геостратешка инвестиција во мирот, безбедноста и стабилноста што може да се направи.

Коста додаде дека постепената интеграција на Западен Балкан во Европската Унија веќе напредува на начин заснован на заслуги.​​​​​​​

Како што рече, во денешната Декларација се нагласува фактот дека Планот за раст за Западен Балкан е вистинската промена.

„Граѓаните во регионот ќе видат удвојување на економскиот раст преточен во нови работни места и подобри услуги во следната деценија. Нема друг регион во светот во кој Европската Унија има инвестирано толку многу ресурси, финансиски ресурси, човечки ресурси и експертиза. Така се гради вистинско стратешко партнерство“, рече тој.

Нагласи дека Европската Унија веќе е најголемиот економски партнер на Западен Балкан, и дека ќе остане најсигурниот партнер и во иднина.

Тој посочи дека сѐ уште постојат одредени предизвици, како билатералните спорови и соседски дилеми кои треба да се решат, и порача дека треба да се задржи фокусот на кредибилни и одржливи реформи.

Коста рече дека изминатата година забележале значителен напредок, особено кај Црна Гора и Албанија.

„И за време на овој самит забележав колективно чувство на одговорност и нов нагон да се работи понапорно и побрзо. Затоа, треба максимално да го искористиме новиот моментум и да ги создадеме сите потребни услови за проширување. Затоа што нема сомнеж дека иднината на Западен Балкан е во нашата заедница“, нагласи Коста.

На самитот присуствуваа премиерот на Северна Македонија Христијан Мицкоски, претседателот на Црна Гора, Јаков Милатовиќ, претседавачката со Претседателството на Босна и Херцеговина Жељка Цвијановиќ, премиерот на Албанија Еди Рама, претседателот на Србија Александар Вучиќ и претседателката на Косово Вјоса Османи.
Лидерите на земјите од ЕУ и Западен Балкан ќе разговараат за геополитичкиот контекст и заедничките предизвици на регионот.

Последен пат Самитот ЕУ - Западен Балкан се одржа на 13 декември минатата година, кога беше објавено дека ЕУ го поддржува членството на земјите од Западен Балкан, но дека од нив очекува спроведување на неопходните реформи.