Курти соопшти дека нема да се појави во Обвинителство да сведочи за истрагата за државните резерви

СКОПЈЕ (АА) - Премиерот на Косово, Албин Курти, истакна дека нема да се појави пред Специјалното обвинителство на Косово во врска со истрагите за државните резерви, јавува Анадолу.

Курти во една ТВ-емисија, меѓу другото, одговори и на прашањето зошто одбива да оди во Обвинителството да даде изјава за истрагите за државните резерви.

Курти го обвини главниот обвинител на Специјалното обвинителство на Косово, Блерим Исуфајн, дека се обидува да „направи меѓународна вест“ со испрашување премиер за случај на корупција.

Косовскиот премиер го спореди својот случај со апсењето на поранешниот гувернер на Централната банка на Косово (ЦБК), Хашим Реџепи, кој беше уапсен за злоупотреба на службената положба во 2010 година, нагласувајќи: „Тие сакаат да направат нешто слично, но поблага варијанта бидејќи веќе не се во можност, како со Хашим Реџепи, кој со лисици беше изнесен од ЦБК.“

Апсењето на Реџепи своевремено доби широко медиумско покривање, но се докажа дека тој не е виновен, а дури доби и отштета за нарушување на угледот.

„Обвинителите и претходно доаѓале кај премиерот. Јас се осмелувам да кажам дека не одам. Да видиме сега дали тие се осмелуваат да дојдат“, нагласи Курти.

Во меѓувреме, шефот на Советот на обвинители на Косово, Ардијан Хајдарај, одговори на изјавите на премиерот Курти, кој рече дека Специјалното обвинителство на Косово има целосна поддршка од КПК, додавајќи дека „сите се еднакви пред законот“.

Специјалното обвинителство на Косово досега пратило две покани до премиерот Курти, но тој не се појавил на разговор. Кабинетот на премиерот истакна дека Курти е подготвен да сведочи, но тоа да го стори во својот кабинет.