Министерот Мисајловски и колегата Хелез од БиХ ја истакнаа посветеноста за развојот на меѓусебната соработка

СКОПЈЕ (АА) – Министерот за одбрана, Владо Мисајловски, денес го пречека министерот за одбрана на Босна и Херцеговина, Зукан Хелез, кој е во официјална посета на Северна Македонија, јавува Анадолу.

Двајцата министри одржаа билатерална средба по која дадоа изјава за медиумите, во која ја истакнаа посветеноста за унапредување на соработката меѓу двете земји.

Министерот Мисајловски му посака добредојде на неговиот колега од Босна и Херцеговина, министерот Хелез, и рече дека неговата посета е потврда за одличните односи меѓу двете земји и посветеноста за унапредување на соработката во областа на одбраната.

„Оваа посета покажува дека имаме одлични односи, дека двете земји сме посветени на развојот на меѓусебната соработка, а особено во одбраната. Истовремено е показател за довербата што ја имаме меѓу нашите две пријателски земји“, изјави Мисајловски.

Тој додаде дека регионалната стабилност и безбедност остануваат приоритет.

„Разговаравме за она што е најважно за граѓаните, а тоа е безбедноста во целиот регион и стабилноста. Тоа е апсолутен приоритет имајќи предвид дека без тоа не може да зборуваме за ниту една друга сфера, особено економијата“, рече Мисајловски.

Министерот за одбрана на Северна Македонија нагласи дека земјата останува посветена на поддршката на Босна и Херцеговина во евроатлантските интеграции.

„Како земја членка на НАТО, подготвени сме да ги споделиме нашите искуства и да ѝ помогнеме на БиХ во процесот на интеграција. Во контекст на безбедноста знаете дека остануваме со целосната поддршка на мировната мисија АЛТЕА во ЕУ бидејќи стабилноста е приоритет и секако во моментот во рамки на оваа мисија имаме 33 припадници“, истакна тој.

Хелез, од своја страна, се заблагодари за топлиот пречек и за поддршката што Северна Македонија ја дава на неговата земја, особено во однос на обуката на кадети од БиХ на Воената академија во Скопје.

„Сакам да истакнам дека по Турција, Северна Македонија е втората земја каде нашите кадети се образуваат, стекнуваат знаење и ќе го пренесат во нашата држава. Тоа е нешто за што сме многу благодарни“, изјави Хелез.

Тој додаде дека двете земји имаат слични предизвици и цели во евроатлантските интеграции.

„Му честитав на колегата за членството на Северна Македонија во НАТО-сојузот, што за нас сѐ уште претставува цел. Работиме на исполнување на програмата на реформи и секоја година ја испраќаме во Брисел. Нашата втора политичка цел е членството во Европската Унија“, рече Хелез.

Министерот за одбрана на БиХ ја нагласи и важноста на соработката во областа на наменската индустрија, велејќи дека БиХ има една од најразвиените наменски индустрии на Западен Балкан и истакна уверување за развивање успешна соработка со Северна Македонија, особено во користењето на нејзините полигони и размена на искуства.

Хелез најави и дека во ноември ќе го пречека својот колега во БиХ, каде што заедно ќе ја посетат мисијата АЛТЕА и македонските војници кои се дел од контингентот.

Двајцата министри ќе присуствуваат на првиот академски час во Воената академија во Скопје, на кој годинава се запишани и повеќе кадети од Босна и Херцеговина.