Agim Sulaj
03 Февруари 2025•Ажурирај: 04 Февруари 2025
ПРИШТИНА (АА) – Главниот град на Косово, Приштина, прогласи вонредна состојба поради ситуацијата создадена од несоодветното управување со отпадот, јавува Анадолу.
Градоначалникот Перпарим Рама на прес-конференцијата утрово прогласи вонредна состојба.
Рама рече дека регионалното јавно претпријатие „Пастрими“, единствено претпријатие што се занимава со собирање отпад во Приштина, не било ефикасно во својата задача.
„Ќе продолжиме да ја користиме вонредната состојба што ја прогласивме за да ангажираме приватни компании да помогнат во целосното чистење на главниот град“, рече Рама.
Во некои населби на косовската престолнина може да се забележат преполни контејнери за отпад, а веќе неколку дена полни останаа и многу канти за отпад на домаќинствата.
Вонредна состојба поради отпад во Приштина беше прогласена и во текот на 2024 година, при што Општина Приштина ангажираше приватни оператори за собирање отпад.
Директорот на Јавните служби во Приштина, Беким Брестовци, на заедничката конференција со градоначалникот Рама рече дека сегашната „влошена“ состојба ги натерала повторно да прогласат вонредна состојба.
Една од главните причини поради ситуацијата е што јавното претпријатие за чистење се соочува со недостиг на капацитети, како резултат на тешкотиите при наплата на долговите од граѓаните.
