Furkan Abdula
29 Март 2023•Ажурирај: 30 Март 2023
СКОПЈЕ (АА) - Министерот за надворешни работи на Северна Македонија, Бујар Османи, во Скопје заедно со министерката за Европа и надворешни работи на Албанија, Ољта Џачка, заменик-министерот за надворешни работи и дијаспора на Косово, Крешник Ахмети, и советникот за надворешна политика на премиерот на Црна Гора, Ѓорѓе Радуловиќ, лансираше нова платформа наречена „Западен Балкан КВАД - 100% усогласеност со надворешната политика на ЕУ”, пренесува Анадолу.
Според соопштението на МНР, во фокус на средбата била целосната усогласеност со заедничката надворешна и безбедносна политика на ЕУ на четирите земји од групата КВАД во светло на новата геополитичка реалност, хибридните закани, енергетската криза и економските последици предизвикани од руската инвазија на Украина.
„По агресијата на Руската Федерација врз Украина, усогласувањето со ЗНБП, но уште пошироко со позициите и вредностите на демократскиот свет, се претвори во еден од најважните приоритети на земјите аспиранти за членство во ЕУ, но и како јасна порака каде овие земји припаѓаат“, нагласи Османи на средбата, изразувајќи задоволство од воспоставувањето на неформалниот форум, наречен QUAD/КВАД.
Според него, секоја од овие земји поединечно, се покажала како доверлив партнер на НАТО и ЕУ, со усогласување со режимот на санкции на ЕУ и САД, но и преку конкретна хуманитарна и друга техничка помош за Украина.
Османи ги извести соговорниците за претстојните реформи, истакнувајќи дека нема отстапување од европскиот пат за Северна Македонија, земја позната по својата мултиетничка демократија и кохезија, за што признание претставува и одлуката да биде домаќин на неодамна одржаните разговори меѓу Косово и Србија во Охрид.
„Беше истакнато дека заедничка стратешка цел на сите земји кои успеале да достигнат потполна хармонизација со одлуките на ЕУ е целосна интеграција во Унијата. Во тој контекст и поврзано со актуелните регионални и меѓународни случувања, процесот на имплементација и спроведување на политиките, регулативата и стандардите на ЕУ претставува највисок државен интерес“, се додава во соопштението.
