Fatjon Cuka
25 Февруари 2026•Ажурирај: 26 Февруари 2026
ПРИШТИНА (АА) - Министерката за Европа и надворешни работи на Албанија, Елиса Спиропали, изјави дека дијалогот Косово - Србија останува единствениот пат за одржливо решение и за долгорочна стабилност во регионот, јавува Анадолу.
Спиропали денеска престојува во официјална посета на Косово, при што се сретна со првиот заменик-премиер и министер за надворешни работи и дијаспора, Глаук Коњуфца, по што одржаа заедничка прес-конференција.
Таа рече дека односот меѓу Албанија и Косово не е обично поглавје на дипломатијата, туку продолжение на заеднички пат, изграден врз жртва, отпор и историска решителност за национален напредок. Спиропали нагласи дека Косово е апсолутен приоритет на надворешната политика на Албанија.
„Што се однесува до дијалогот со Србија, нашиот став е јасен и непоколеблив: Дијалогот останува патот за одржливо решение и за долгорочна стабилност во регионот. Но стабилноста не се гради врз негирање на реалноста. Реалност е дека Косово е независна и суверена држава. Заемното признавање е единствената одржлива основа за здрави односи меѓу двете држави и во нашиот регион, ослободен од наследените тензии. Србија треба да се помири со оваа реалност“, рече таа.
Спиропали нагласи дека евроатлантската интеграција на Косово е клучен елемент на регионалната безбедност и според неа, присуството на НАТО и улогата на КФОР остануваат незаменливи фактори на стабилност „во Европа разнишана од војна и геополитички тензии“.
„Заедничкиот договор меѓу Албанија, Косово и Хрватска е важен елемент не само за заеднички обуки и заедничка безбедност, туку и за приближување на Косово кон структурите на НАТО. Одржувањето на Самитот на НАТО во 2027 година во Тирана треба да биде одлична можност за приближување на Косово кон евроатлантските структури“, рече Спиропали.
Говорејќи за процесот на судење на поранешните лидери на Ослободителната војска на Косово (ОВК) во Хаг, таа рече: „Правдата мора да биде целосна правда, без прекршување на меѓународните правни стандарди и без прекршување на човековите права“.
Шефицата на албанската дипломатија меѓу другото рече дека дошло време во текот на 2026 година да се одржи заедничка средба меѓу двете влади.
- Коњуфца: Колку посилна ќе биде координацијата, толку посигурен ќе биде нашиот пат кон Европската Унија
Коњуфца изјави дека разговарале за понатамошно продлабочување на политичката и економската соработка меѓу Косово и Албанија, за целосна координација во надворешната политика и за зајакнување на изградбата на нивните внатрешни дипломатски капацитети.
„Убеден сум дека нашата координација ќе ја зајакне заложбата на Косово за членство и во Советот на Европа и за нашето приближување и членство во НАТО и во други важни меѓународни организации. Нашата иднина, како и нашето минато, ќе бидат засекогаш поврзани. Колку посилна ќе биде нашата координација, толку посигурен ќе биде нашиот пат кон Европската Унија“, рече тој.
Коњуфца нагласи дека секогаш соработуваат кон исполнување на аспирациите на албанскиот народ.
„Ѝ честитам на Република Албанија за овие џиновски чекори што ги направи во однос на европските интеграции. Ние сакаме да го дадеме истиот пример како Република Албанија“, рече тој.
Спиропали ќе биде примена на одделни средби и од претседателката на Косово, Вјоса Османи, претседателката на Собранието, Албулена Хаџиу, како и од премиерот Албин Курти.
