Mustafa Talha Öztürk
20 Септември 2023•Ажурирај: 22 Септември 2023
БЕЛГРАД (АА) - Шефот за надворешна политика на Европската Унија (ЕУ), Жозеп Борел, денес во Њујорк беше домаќин на состанокот на лидерите на земјите од Западен Балкан на маргините на Генералното собрание на Обединетите нации (ОН), јавува Анадолу.
Неформалниот состанок се одржа во контекст на зајакнувањето на соработката со партнерите од регионот за надворешната политика што, исто така, дава можност за размена на мислења за предизвиците во регионот и неговата европска иднина.
Главен фокус беа проширувањето и идеите за постепената интеграција на партнерите во ЕУ.
„Борел и лидерите од Западен Балкан разговараа за начините за заедничко справување со штетните последици од руската војна против Украина врз цените на храната и енергијата, како и врз стабилноста и безбедноста во Европа и на глобално ниво“, се вели во соопштението на ЕУ.
Борел ја истакна важноста на блиската соработка на мултилатералните платформи.
„Во овој контекст, тој потсети дека Европската Унија смета на сите земји кандидати како доверливи партнери и во надворешната, безбедносната и одбранбената политика, вклучително и во усогласувањето со одлуките на ЕУ во овие домени“, се нагласува во соопштението.
Лидерите од регионот, исто така, имаа шанса да разговараат за очекувањата во врска со пристапувањето во ЕУ во време кога политиката за проширување на блокот доби нов импулс.
На состанокот учествуваа лидерите на Северна Македонија, Албанија, Босна и Херцеговина, Косово, Црна Гора и Србија.
