Русија нема да има пристап до услугите на Банката за меѓународни порамнувања

БРИСЕЛ (АА) - Пристапот до услугите на Банката за меѓународни порамнувања (БИС) е суспендиран поради нападот на Русија врз Украина, јавува Агенција Анадолија (АА).

Портпаролот на БИС за АА изјави дека на Русија, која ја нападна Украина, ѝ е суспендиран пристапот до сите услуги на БИС.

Наведувајќи дека БИС ги следи сите меѓународни санкции против Централната банка на Русија, портпаролот истакна дека Банката за меѓународни порамнувања (БИС) не може да се користи за заобиколување на санкциите против Централната банка на Русија.

Според одлуката, Централната банка на Русија нема да може да пристапи до услугите на БИС или да присуствува на состаноци на институцијата и на други активности.

Меѓународната финансиска институција БИС, со седиште во Швајцарија, е основана во 1930 година во градот Базел.

Таа има повеќе од 60 членки, вклучувајќи ги Федералните резерви на САД (ФЕД), Европската централна банка (ЕЦБ), Банката на Велика Британија (БОЕ) и Централната банка на Република Турција (ЦБРТ).

БИС има за цел да развие меѓународна монетарна и финансиска соработка. Институцијата дејствува како банка за централните банки.