ИДЛИБ (АА) - БУРАК КАРАЏАОГЛУ / АХМЕТ КАРААХМЕТ -
Трговците чии работни места беа оштетени при бомбардирањето на пазарот во областа Ериха во Идлиб, Сирија, од страна на силите на режимот на Башар ал Асад, сведочат дека не можат да ги заборават моментите на страв и дека ќе мигрираат во пограничен регион доколку нападите продолжат, пишува Агенција Анадолија (АА).
Силите на режимот, составени од Армијата на режимот на Асад и странски терористички групи поддржани од Иран, на 20 октомври со артилериски оган го нападнаа пазарот во јужната рурална област Ериха. При нападот, 13 цивили, меѓу кои и деца кои одеа на училиште, ги загубија животите.
Дописниците на Агенција Анадолија (АА) од Идлиб разговараа со трговците чии работни места беа оштетени во нападот.
Трговецот Мустафа Кирејди, наведувајќи дека поради интензивните напади на режимските сили од областа Маратунуман, мигрирал во подрачјето на Ериха на југот на Идлиб, рече: „По нападот заедно со моите деца ги видовме загинатите чии тела беа распарчени.“
Тој раскажа за моментите на страв за време на нападот. „Режимот изврши напад и овде. Ние не сме терористи. Во нападот загинаа моисоседи и деца што одеа на училиште. Дел од прехранбените производи во мојата продавница станаа неупотребливи. Режимот на Асад нѐ прогласи за терористи и исфрла ракети.“
Тој рече дека ранетите лица ги пренеле во болница, а мртвите тела ги собрале, и дека не може да ги заборави тие моменти.
Кирејди изрази загриженост од нови напади. „Ако повторно бидат извршени напади овде, ќе мигрираме во камповите кои се наоѓаат на границата.“
Рече дека во Идлиб работи во маркет:
„Тука сум работник, единствена наша желба е да се вратиме во нашиот дом. Овде нема ниту терористи, ниту пак терористички активности. Тие што загинаа беа деца кои одеа на училиште. Моите деца беа погодени од масакрот што го видоа, постојано се плашат и сакаат да спијат.“
- „Тука нема терористи“ -
Мухамед, кој три години во Ериха работи со живинарство, наведе дека во моментот на нападот побегнале во засолништа.
Нагласувајќи дека во нападот ги загубил својот братучед и 15-годишниот чирак, Мухамед истакна: „Учениците кои минуваа низ улицата и некои цивили се засолнија во нашата продавница. Четвртата граната падна пред мојата продавница. Имаше двајца ученици кои беа засолнети таму, едниот се викаше Омер, а другиот, брат му Али. Едниот беше повреден, а другиот го загуби животот.“
Мухамед истакна дека нема каде да избегаат освен во засолништата ако нападите се повторат.
„Доколку се засилат нападите, ќе го напуштиме ова место и ќе мигрираме во пограничните области, односно во безбедните подрачја. Ние не сме терористи. Тука нема терористи. Како што и сами можете да видите, има само невини цивили. Како што беше снимено и од камерата на продавницата, има само ученици и цивили.“
