Европската Унија најави помош од 71 милион евра за Палестина

ЕРУСАЛИМ

Европската Унија синоќа најави пакет со финансиска помош за Палестина во износ од 71 милион евра во борбата против ширењето на Ковид-19, пренесува Агенција Анадолија (АА).

Во соопштението на ЕУ се наведува дека ветувањето е дадено вчера за време на состанокот меѓу нејзиниот претставник во Ерусалим, Сфен Кун фон Бургсдорф, и палестинскиот премиер Мохамад Штајех.

Пакетот со помош меѓу останатото вклучува десет милиони евра за шест болници во Источен Ерусалим, 40 милиони евра за службениците на Палестинската управа и шест милиони евра за палестинските компании.

Пет милиони евра се доделени за помош на локалните заедници, а околу седум милиони евра се наменети за невладините организации кои работат на тоа подрачје.

Вирусот Ковид-19 најпрвин се појави во Вухан, Кина, во декември 2019 година и досега се рашири во 200 земји низ светот, пренасочувајќи го епицентарот на вирусот во Европа.

Во светот се регистрирани над 1,6 милиони потврдени случаи на вирусот, а бројот на смртни случаи во светот е повеќе од 95.000. Речиси 354.000 пациенти се излекувани.