Палестински фотограф ја освои главната награда на фестивалот „Visa pour l'image“ во Франција

ПЕРПИЊАН (АА) - Палестинскиот фотограф Лоај Ејуб ја освои главната награда на фестивалот „Visa pour l'image“ во Перпињан, Франција, еден од најпрестижните светски натпревари за фоторепортерство, јавува Анадолу.

Ејуб ја доби наградата за неговата моќна фотографија која го прикажува човечкото страдање во Газа.

Во својот говор по наградата, одржан преку видеоконференција, тој ја посвети наградата на „сите новинари и Палестинци убиени додека ги извршувале своите должности во Газа.“

Неговото споменување на палестинската група Хамас како „движењето на отпорот на Палестина“ за време на неговиот говор предизвика реакција од градоначалникот на Перпињан од крајната десница, Луис Алиот, кој повика наградата да се поништи.

Сепак, организаторите на фестивалот го одбија барањето на Алиот.

Жан-Франсоа Лерој, директорот на фестивалот „Visa pour l'image“, застана во одбрана на одлуката на жирито во интервју за шпанската новинска агенција ЕФЕ.

„Нашето жири се состои од меѓународни уредници на фотографии и експерти. Без разлика дали се согласувам со нив или не, секогаш сум ги почитувал нивните одлуки“, рече тој.

Лерој, исто така, ги истакна предизвиците со кои се соочуваат странските медиуми во Газа, посочувајќи дека Израел ја ограничил нивната работа, оставајќи ги локалните новинари како примарен извор на информации од зоната на конфликтот.