Јилдирим: „Следниот чекор е да се постигне траен мир во Сирија“

БУРДУР (АA) - Турскиот премиер, Бинали Јилдирим, денес истакна дека обезбедувањето траен мир во Сирија е поврзано со воспоставувањето на новата влада во блискоисточната земја, јавува Anadolu Agency (AA).

„Ние презедовме иницијатива, заедно со Русија и Иран, за ставање крај на граѓанската војна која се случува во Сирија веќе седум години, иницијатива за да се стави крај на судирите“, рече Јилдирим во своето обраќање на Конгресот на владејачка Партија за правда и развој (AK Parti) во турската област Бурдур, во јужниот дел на земјата.

„Следниот чекор е да се постигне траен мир. Со други зборови, формирањето на нова влада во Сирија, каде што ќе бидат вклучени сите групи кои не биле вмешани во тероризам, како и сите етнички групи, земајќи го предвид територијалниот интегритет“, рече Јилдирим.

Сирија е заробена во граѓанска војна уште од почетокот на 2011 година, кога режимот на Башар ал-Асад ги разби продемократските протести со употреба на насилство.

Според официјалните податоци на ОН, оттогаш, стотици илјади луѓе се убиени, а над 10 милиони други се раселени.