„Мајчиното млеко дејствува како штит од многу болести“

АНКАРА (АА) - Ексклузивното доење на бебињата во првите шест месеци и дополнувањето со соодветни нутриенти до двегодишна возраст ги штити бебињата од разни болести, како што се дијабетес, рак, астма и дебелина, јавува Анадолу.

Мелек Килич, претседателката на Здружението на волонтери за доење и мајчино млеко ТЕМАС, говореше за Анадолу по повод Националната недела на доењето од 1 до 7 октомври, рече дека доењето е најдобра форма на исхрана што обезбедува идеален раст и развој за бебето.

„Научните студии покажаа дека дијареја, пневмонија, воспаление на средното уво, алергиски болести, дијабетес тип 1 и тип 2, целијачна болест, воспалителни болести на цревата, хипертензија, рак, алергии, астма, дебелина, нарушувања на забната структура и некои ментални болести се помалку честа појава кај доенчињата“, нагласи таа.

Килич, исто така, рече дека училишните постигнувања на децата што се хранат со мајчино млеко се повисоки.

Таа, сепак, нагласи: „И покрај чудесната содржина и придонесите за здравјето, 77 милиони новородени бебиња во светот не можат да добијат мајчино млеко во првиот час.“

Таа предупреди дека оваа ситуација „ги лишува бебињата од основните хранливи материи, антитела и близок контакт со мајката што ќе ги заштити од ризикот од болести и смрт“.

- Можни ризици -

Килич дополнително ги истакна ризиците од одложување на давањето мајчино млеко бидејќи тоа, за жал, може да го зголеми ризикот од смрт кај новородените бебиња.

Според податоците на УНИЦЕФ, кај бебињата што никогаш не биле доени има седумпати поголем ризик да умрат поради каква било инфекција отколку бебињата што биле доени барем некое време во првите шест месеци по раѓањето.

Исто така, кај бебињата што никогаш не биле доени, ризикот од смртност е 14 пати поголем отколку кај бебињата што се ексклузивно доени.

Смртните случаи кај децата може да се намалат за 13 отсто со ексклузивно доење и за околу 20 отсто со правилни практики за дополнително хранење, покажуваат податоците на УНИЦЕФ.

Според Светската здравствена организација, нутритивните недостатоци, кои сами по себе се одговорни за 7 отсто од смртните случаи на деца под петгодишна возраст, се главна основна причина за околу половина од смртните случаи.

СЗО соопшти дека повеќе од 800.000 животи ќе бидат спасени секоја година доколку стапката на доилки биде висока.

Килич нагласи дека првиот чекор што треба да се направи за да се обезбеди идеален раст и развој на бебињата и да се спречат недостатоците во исхраната е да се оствари контакт со кожата меѓу мајката и бебето веднаш по раѓањето.

„Исто така, се препорачува бебињата да се дојат ексклузивно во првите шест месеци, а по шестиот месец со соодветни комплементарни хранливи материи до двегодишна возраст.“

- Проект „Жени лидери“ -

Килич рече дека Здружението ТЕМАС, во рамките на проектот „Жени лидери“, работи на зголемување на јавната свест низ Туркије, почнувајќи со работа првенствено во подрачјето на земјотресот.

Таа рече дека започнале важен проект за мајките во регионот на земјотресот во јужниот дел на Туркије.

„Со седиште во Хатај, Газиантеп и Адијаман, здружението им обезбедува советување на бремените жени и мајките што дојат во подрачјето на земјотресот и се бараат решенија за проблемите на терен.“

„Продолжуваме да обезбедуваме поддршка со 160 експерти за бесплатно советување за доење, здравје на детето и здравје на мајката за сите мајки, особено нашите мајки во подрачјата на катастрофата или под какви било околности и услови.“

„Профилите на социјалните мрежи, апликацијата за поддршка на мајките и нашиот онлајн панел за поддршка на мајката активно работат и се опслужуваат илјадници мајки и бебиња“.