ВО ЖИВО - Леталото со екипажот на вселенската мисија Ax-3 се спои со Меѓународната вселенска станица

ИСТАНБУЛ (АА) - Екипажот на вселенската мисија Ax-3, во кој е и првиот турски вселенски патник Алпер Гезеравџи, пристигна на Меѓународната вселенска станица денес во 05.42 часот по Источно стандардно време, јавува Анадолу.

Мисијата беше лансирана од Вселенскиот центар Кенеди на НАСА, Флорида во 16.49 часот Источно стандарно време во четвртокот со ракетата Фалкон 9 на приватната компанија за истражување на вселената Спејс икс.

Гезеравџи и неговите тројца колеги од екипажот од САД/Шпанија, Италија и Шведска ќе спроведат над 30 научни експерименти и демонстрации на Меѓународната вселенска станица како дел од мисијата Ax-3.

Мисијата Ax-3 ја предводи Мајкл Лопез-Алегрија, кој ги претставува САД и Шпанија, додека дел од екипажот се и Валтер Виладеи од Италијанските воздухопловни сили како пилот и Маркус Ванд од Шведска, претставник на Европската вселенска агенција.

Гезеравџи за време на 14-дневниот престој на Меѓународната вселенска станица ќе спроведе 13 научни истражувања.

Процесот на спојување беше планиран за 19 јануари, но полетувањето беше одложувано двапати од 9 јануари за 17 јануари и 18 јануари.

Ракетата Фалкон 9 долга 70 метри, со дијаметар од 3,7 метри и тежина од приближно 550 тони, има носивост од 22.000 килограми (над 24 тони) во ниската орбита на Земјата, 8.300 килограми во геостационарната трансферна орбита и 4.000 килограми на Марс.

Капсулата Драгон, долга 8,1 метри, која може да превезе седум лица или исто толку товар во просторот под притисок со проток на воздух, може да носи товар во задниот дел кој е без притисок.

Како најголема вселенска станица, Меѓународната вселенска станица, изградена од големите вселенски агенции - НАСА (САД), Роскосмос (Русија), JAXA (Јапонија), ESA (Европа) и CSA (Канада) - служи за научни истражувања во ниската орбита на Земјата.