Ердоган: Турција ќе го воспостави првиот хиперскалски центар на платформата за податоци

Потпишан е стратегиски меморандум за разбирање за воспоставување на првиот хиперскалски центар на платформата за податоци во Турција, изјави денес турскиот претседател Реџеп Таип Ердоган, јавува Анадолу.

Говорејќи на церемонијата за доделување награди за 2025 година на Советот за научни и технолошки истражувања на Турција (ТУБИТАК) и Турската академија на науките (ТУБА) во Анкара, Ердоган рече дека проектот е планиран да стане оперативен во периодот 2028–2029 година.

„Со овој проект Турција ќе воспостави дигитален мост меѓу Европа, Азија и Блискиот Исток, а нашата земја ќе стане центар за податоци во својот регион“, нагласи Ердоган.

Тој истакна дека е неопходно земјата внимателно да ги следи најновите научни достигнувања, но и целосно да ги усвои, градејќи ја својата иднина врз идеи и дела што произлегуваат од националниот идентитет.

„Од вештачката интелигенција до автономните системи, од центрите за складирање и обработка на податоци до беспилотните технологии – Турција спроведува иницијативи и проекти што многу земји ги следат со восхит“, додаде турскиот претседател.

Ердоган им честиташе и на академиците што постигнале значајни резултати во различни научни области, меѓу кои електрохемија, механика на цврсти тела, експериментална психологија, РНК-биологија, стоматологија, неврологија, историја и филозофија.

Тој посочи дека добитниците на наградите доаѓаат од универзитети од сите региони на земјата, оценувајќи го тоа како показател дека високообразовните институции во различни градови даваат иновативен придонес кон научниот капацитет на Турција.