По речиси две години во Газа започна новата учебна година

ГАЗА (АА) - Нова учебна година започна денес во Појасот Газа по прекинот на 16-месечната воена офанзива на Израел врз енклавата, соопшти Министерството за образование, пренесува Анадолу.

Во соопштението на Министерството се вели дека учениците ќе присуствуваат на настава „во училиштата кои не се уништени, се реновирани и опремени, или во алтернативни училишта и образовни пунктови кои се формирани во многу области“.

Министерството нагласи дека се обидува да обезбеди и онлајн настава за учениците кои не можат да посетуваат училишта „со цел да се осигура дека ќе го продолжат своето образование“.

Новата учебна година „започна во Газа во услови на масовно уништување и сериозен недостиг на ресурси и услови“.

Министерството апелира до организациите за човекови права да извршат притисок врз Израел да дозволи влез на материјалите потребни за образовниот процес во Газа.

Според палестинските податоци, 85 отсто од училиштата во Газа не се функционални поради израелското бомбардирање.

Канцеларијата за медиуми на Владата на Газа соопшти дека најмалку 12.800 ученици, 800 наставници и административен персонал се убиени, а уништени се 1.166 образовни установи во израелската војна која започна од октомври 2023 година, проценувајќи ја штетата врз образовниот сектор на над 2 милијарди долари.

Договорот за прекин на огнот во Газа стапи на сила на 19 јануари, со што беше запрена геноцидната војна на Израел, во која убиени се над 48.300 Палестинци, повеќето жени и деца, и која енклавата ја остави во урнатини.

Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговите постапки во енклавата.