Турција распореди шест авиони Ф-16 и системи за противвоздушна одбрана во Северен Кипар

ИСТАНБУЛ (АА) - Турција денес соопшти дека шест борбени авиони и системи за противвоздушна одбрана се распоредени во Турската Република Северен Кипар (ТРСК) како дел од напорите за зајакнување на безбедноста на територијата во услови на регионални тензии, јавува Анадолу.

Во соопштението, турското Министерство за национална одбрана истакнува: „Како дел од фазниот пристап за зајакнување на безбедноста на Турската Република Северен Кипар во однос на неодамнешните случувања во нашиот регион, шест борбени авиони Ф-16 'Фајтинг Фалкон' и системи за противвоздушна одбрана се распоредени во Турската Република Северен Кипар од денес.“

Во соопштението се додава дека Анкара би можела да преземе натамошни чекори во зависност од тоа како ќе се развива ситуацијата.

„Дополнителни мерки ќе продолжат да се преземаат врз основа на натамошните случувања, доколку се смета за потребно“, се вели во соопштението.

Објавата доаѓа во услови на ескалација на тензиите поради нападите на САД и Израел врз Иран.

Во средата грчки борбени авиони Ф-16В слетаа на аеродромот „Пафос“ на грчки Кипар по иранските напади поврзани со ескалацијата во регионот.