Кина очекува САД и Русија преку дијалог да ги решат билатералните прашања

ИСТАНБУЛ (АА) - Кина денес изрази надеж дека САД и Русија ќе ги решат своите билатерални прашања преку дијалог, јавува Анадолу.

„Се надеваме дека САД и Русија можат да ги решат билатералните прашања преку комуникација и дијалог, што е од корист за меѓународниот и регионалниот мир и стабилност“, рече Лин Џијан, портпарол на кинеското Министерство за надворешни работи.

Тој се огласи по најголемата размена на затвореници меѓу Русија и Западот од ерата на Студената војна. Во размената на затворениците посредуваше Туркије.

„САД и Русија се постојани членки на Советот за безбедност на ОН и влијателни големи сили“, рече Лин.

Турската Национална разузнавачка агенција (МИТ) вчера изврши успешна размена на затвореници во која беа вклучени седум земји во една од најобемните операции за размена во последниве години.

Вкупно 26 лица беа разменети и транспортирани во турскиот главен град Анкара со седум авиони - по еден од Германија, Полска, Словенија, Норвешка и Русија и двајца од САД, според безбедносни извори. Белорусија исто така беше вклучена во размената.

Десет заложници, меѓу кои и две деца, беа префрлени во Русија,13 беа испратени во Германија, а тројца во САД.