„Авионската несреќа во Казахстан се должи на физичко и техничко надворешно мешање“, покажа прелиминарна истрага

МОСКВА (АА) - „Азербејџан ерлајнс“ денес објави дека според прелиминарните резултати од истрагата, физичко и техничко надворешно мешање ја предизвикало несреќата на нејзиниот авион „Ембраер 190“ во Казахстан во средата, јавува Анадолу.

Во соопштението на Телеграм се вели дека поради оваа причина, почнувајќи од сабота ќе бидат суспендирани летовите до неколку руски градови, вклучувајќи ги Минерални Води, Сочи, Волгоград, Уфа, Самара, Саратов, Нижни Новгород и Владикавказ.

„Оваа одлука, донесена во согласност со Државната управа за цивилно воздухопловство на Азербејџан, се заснова на прелиминарните резултати од истрагата за падот на авионот „Ембраер 190“ на летот „Ј2-8243“ Баку - Грозни на „Азербејџан ерлајнс“ поради физичко и техничко надворешно мешање и ги разгледува потенцијалните ризици за безбедноста на летовите. Суспензијата ќе остане во сила до завршувањето на конечната истрага“, се вели во соопштението.

Компанијата додаде дека суспензијата на летовите кон градовите Грозни и Махачкала, која е на сила од средата, продолжува.

„Поради безбедносни причини, донесена е одлука за прекин на летовите на другите авиокомпании до споменатите дестинации, вклучувајќи ги Грозни и Махачкала“, се вели во соопштението.

Компанијата објави дека патниците на „Азербејџан ерлајнс“ до и од наведените градови во Русија, кои не се во можност да ги користат услугите на авиокомпанијата поради моменталната ситуација, имаат право да добијат целосен поврат без пенали или повторно да резервираат билети.

Авионот на „Азербејџан ерлајнс“, кој леташе на релацијата од Баку кон градот Грозни во руската Чеченска Република, во средата се урна со 67 патници во близина на Актау, лоциран на брегот на Каспиското Море.

Казахстанските власти соопштија дека во несреќата животот го загубиле 38 лица, додека 29 преживеале.