„Договорот за црноморското жито е суспендиран“, објави Кремљ

МОСКВА (АА) - Портпаролот на Кремљ, Дмитриј Песков, изјави дека Договорот за транспорт на жито преку црноморскиот коридор е суспендиран и дека Русија ќе продолжи со Договорот кога ќе бидат исполнети условите, известува Анадолу.

Песков зборуваше за Договорот за Црноморскиот коридор за жито, кој истече денес.

„Договорот за житниот коридор, всушност, дојде до својот крај, тој е суспендиран. Русија ќе се врати на Договорот за жито веднаш штом бидат прифатени релевантните услови. Делот од Договорот во врска со Русија не е исполнет“, наведе Песков.

Тој истакна дека суспензијата на Договорот нема врска со нападот врз кримскиот мост.

Портпаролката на Министерството за надворешни работи на Русија, Марија Захарова, истакна дека Москва веќе ги известила Украина, Туркије и ОН дека се противи на продолжување на Договорот за транспорт на жито.

Туркије, Обединетите нации (ОН), Русија и Украина на 22 јули 2022 година во Истанбул потпишаа Договор за обновување на извозот на жито од три украински црноморски пристаништа што биле блокирани по почетокот на војната меѓу Русија и Украина.

Во Истанбул е воспоставен Заеднички координативен центар, составен од трите земји и ОН, кој ги надгледува пратките.

На 1 август 2022 година исплови првиот брод според историскиот договор од украинското пристаниште Одеса.

Туркије, која доби меѓународни пофалби за својата единствена посредничка улога меѓу Украина и Русија, повеќепати ги повика Киев и Москва да ја завршат војната со преговори.