„Израел намерно ги гаѓа новинарите што на светот му го пренесоа масакрот во Газа“, обвини Владата во Газа

ИСТАНБУЛ (АА) - Владата во Газа изјави дека најостро ја осудува политиката на Израел за намерно гаѓање, убивање и егзекуција на новинари, известува Анадолу.

Канцеларијата за медиуми на Владата во Газа објави писмено соопштение откако почина новинар кога во нападот на Израел врз градот Кан Јунис, на југот на Појасот Газа, беше запален шаторот во кој престојуваа новинари.

„Најостро ги осудуваме политиките на Израел за намерно целење, убивање и егзекуција на новинари“, се вели во соопштението.

Во соопштението, во кое се повикуваат Меѓународната федерација на новинари, Унијата на арапски новинари и сите медиумски организации во светот „да ги осудат овие систематски злосторства на Израел врз палестинските новинари“, се нагласува дека израелската армија продолжува директно и систематски да ги гаѓа палестинските новинари што ги ризикуваат животите за да го обелоденат масакрот што Израел го спроведува во Појасот Газа.

Се повикуваат меѓународната заедница и релевантните медиумски организации да извршат ефикасен притисок врз Тел Авив за да ги запре тековните израелски злосторства, да ги заштитат новинарите, да ги гонат сторителите на нападите пред меѓународните судови и да се стави крај на геноцидот.

„САД, Англија, Германија и Франција, земјите што се партнери во геноцидот, исто така, се одговорни за овие убиствени напади на Израел“, се вели во соопштението.

Се додава дека еден новинар изгорел до смрт во нападот на израелската армија врз шаторот во кој престојувале новинари во градот Кан Јунис, јужно од Појасот Газа. Со овој смртен случај бројот на убиени новинари од 7 октомври 2023 година досега се зголеми на 210.

Израелски воени авиони бомбардираа шатор во кој престојуваа новинари во близина на болницата „Насер“ во градот Кан Јунис, а по нападот избувна пожар во шаторот. Според првичните сознанија, во нападот загинал еден новинар, а 10 лица, од кои деветмина новинари, биле повредени.

Израелската армија во нападите врз Газа честопати како цел ги има претставниците на печатот, кои имаат имунитет според меѓународните договори.