„Ниту Стејт департментот ниту Пентагон немаат реални информации за тоа што се случува во Кремљ“

МОСКВА (АА) - Нема да има промени на валутата за примателите на рускиот гас, бидејќи тие ќе плаќаат во истата валута предвидена со договорите, изјави денеска портпаролот на Кремљ, Дмитриј Песков, јавува Агенција Анадолија (АА).

„Шемата за плаќање на рускиот гас во рубљи е подготвена, наскоро ќе биде претставена на јавноста“, истакна Песков на дневниот брифинг за новинарите во Москва.

„Всушност, нема да има промени за примателите на руски гас кои плаќаат за овие испораки. Во секој случај, тие купуваат рубљи за истата валута како што е наведено во договорите. Русија останува посветена на сите свои обврски од постојните договори, и по количество и по цена“, рече Песков.

Тој потврди и дека се разгледува опцијата Германија да плаќа во евра преку банката „Гаспром“.

Прашан за продолжувањето на руско-украинските мировни преговори, Песков вети дека од петок ќе информира во врска со тоа.

Што се однесува до средбата меѓу рускиот претседател Владимир Путин и неговиот украински колега Владимир Зеленски, тој рече дека тоа може да се случи кога ќе биде финализирана работата на мировниот договор.

Во врска со коментарот на Пентагон, кој тврди дека Путин е погрешно информиран од неговите високи советници за тоа како се одвива неговата војна против Украина и за состојбата на руската економија, Песков рече дека „ниту Стејт департментот ниту Пентагон немаат реални информации за тоа што се случува во Кремљ“.

„Ова не е само штета, туку предизвикува загриженост, бидејќи таквото целосно недоразбирање води до погрешни одлуки, избрзани одлуки кои имаат многу лоши последици“, истакна тој.

На 23 март, рускиот претседател Владимир Путин ѝ наложи на Владата да ги префрли плаќањата за испораките на гас во Европа во рубли, бидејќи еврото и доларот беа дискредитирани кога Западот го замрзна рускиот државен долг во овие валути.

Вчера, германската Влада соопшти дека плаќањата ќе продолжат да се вршат исклучиво во евра и ќе бидат префрлени на банката „Гаспром“, која не е опфатена од санкциите, и која потоа ќе ги претвори парите во рубљи.

Руско-украинската војна, која започна на 24 февруари, наиде на меѓународен гнев кај ЕУ, САД и Велика Британија, кои, меѓу останатите, спроведуваат строги финансиски санкции кон Москва.

Најмалку 1.189 цивили се убиени во Украина, а 1.901 се повредени, според проценките на ОН, а се стравува дека вистинската бројка е многу поголема.

Повеќе од 4 милиони Украинци побегнале во соседните земји, а милиони се раселени внатре во земјата, според Агенцијата за бегалци на ОН.