Melike Pala
24 Октомври 2025•Ажурирај: 26 Октомври 2025
БРИСЕЛ (АА) - Ирците денес гласаат за избор на нов претседател, при што повеќе од 3,6 милиони граѓани имаат право на глас на над 5.500 избирачки места низ целата земја, јавува Анадолу.
Според локалните медиуми, гласачките места се отворени во 7 часот наутро по локално време и ќе бидат отворени до 22 часот, со што завршува кампањата во која официјално беа номинирани тројца кандидати.
На избирачките ливчиња се најдоа Џим Гавин од Фијана Фејл, Хедер Хамфрис од Фајн Гејл и независната кандидатка Кетрин Коноли.
Сепак, Гавин се повлече од трката по завршувањето на рокот за номинации, што значи дека неговото име остана на ливчето, а гласовите за него ќе бидат прераспределени според изборниот систем на Ирска.
Гласачите ги рангираат кандидатите според приоритет – прв, втор или трет избор – во рамките на пропорционалниот систем познат како „единствен пренослив глас“.
Ако ниеден кандидат не го достигне потребниот праг, кандидатот со најмалку гласови се елиминира, а неговите гласови се пренесуваат на следниот избор според приоритетите на гласачите.
За десетици илјади граѓани овие избори се прво искуство со гласање.
Според анкетата објавена вчера, независната кандидатка Кетрин Коноли има поддршка од 40%, наспроти 25% за нејзината соперничка Хедер Хамфрис, поранешна министерка во Владата. Кога се исклучени неопределените гласачи и неважечките ливчиња, поддршката за Коноли расте на 55% наспроти 35% за Хамфрис.
Две претходни анкети оваа недела, исто така, ѝ дадоа значителна предност на 68-годишната Коноли во трката за наследник на актуелниот претседател Мајкл Д. Хигинс, кој по два седумгодишни мандата нема право да се кандидира повторно.
Броењето на гласовите ќе започне во сабота во 9 часот наутро, кога ќе бидат отворени гласачките кутии.
