16 мигранти се удавија, 63 се спасени при потонување на чамец недалеку од грчкиот брег

АТИНА (АА) – Најмалку 16 лица загинаа, а десетици се спасени откако вчера потона чамец што пренесува мигранти во близина на грчкиот остров Парос, јавува Агенција Анадолија (АА).

Парос е дел од островската група Киклади во Егејското Море, што се наоѓа приближно 150 километри југоисточно од грчкиот главен град Атина.

Операцијата за пребарување и спасување е во тек во областа, а досега од водите на околу осум километри од Парос извлечени се 63 лица, соопштија денес надлежните.

Крајбрежната стража истакна дека чамецот се превртел со околу 80 мигранти и дека се работи на пронаоѓање на исчезнатите.

Пет чамци на Крајбрежната стража, хеликоптер на морнарицата и авион C-130 учествуваа во операцијата, а во спасувачите напори помагаа и девет чамци што пловеа во подрачјето.

Ова е трет пат во два дена да потоне брод со мигранти во Егејското Море.

Рано вчера, Крајбрежната стража јави дека 11 мигранти се удавиле, а 90 биле спасени од карпестите островчиња во близина на островот Антикитера помеѓу Крит и Пелопонез.

Во четвртокот, друг брод со мигранти потона во близина на островот Фолегандрос. Тринаесет лица беа спасени, а 17 се водат како исчезнати.