Авиокомпаниите „Емирати“ и „Етихад ервејс“ делумно ги обновуваат летовите по ескалацијата во регионот

БЕРЛИН (АА) - Авиокомпаниите од Обединетите Арапски Емирати (ОАЕ) „Емирати“ и „Етихад ервејс“ денес објавија дека повторно воспоставуваат ограничени летови од нивните главни бази, по постепеното отворање на воздушниот простор во регионот, јавува Анадолу.

Двете авиокомпании привремено ги прекинаа своите операции по ескалацијата на тензиите во регионот, по заедничките напади на САД и Израел врз Иран минатата сабота, како и одговорот на Иран насочен кон Израел и земјите од Заливот каде што се наоѓаат американски бази.

Сепак, со повторното отворање на воздушниот простор започна процесот на нормализација на оперативните процеси.

Авиокомпанијата со седиште во Абу Даби, „Етихад ервејс“, соопшти дека ќе има ограничен распоред на летови што ќе биде на сила до 19 март.

Компанијата ќе реализира летови до околу 70 дестинации, меѓу кои и Франкфурт, Лондон и Париз.

Од друга страна, „Емирати“, со седиште во Дубаи, информираше дека летовите до 82 дестинации ќе се одвиваат до натамошно известување.

Во соопштението се нагласува дека на патниците што транзитираат низ Дубаи ќе им биде дозволено патување само доколку нивните поврзани летови се претходно потврдени.

Исто така, се забележува дека приоритет ќе имаат патниците со постојни резервации, додека оние без потврдени билети беа замолени да не доаѓаат на аеродромите. Двете компании порачаа дека внимателно ја следат безбедносната состојба и дека распоредот може да се менува во зависност од развојот на настаните.

Во меѓувреме, авион на „Луфтханза“, најмен од германската Влада, вчера изутрина ги пренесе во Франкфурт германските државјани на кои им беше потребна помош за напуштање на земјите од Заливот.

Германскиот министер за надворешни работи Јохан Вадефул најави дека како дел од планот за евакуација ќе бидат реализирани уште два дополнителни лета за германските граѓани.